डिचोली: यापूर्वी दोन बिबटे पकडकेल्या डिचोली शहराजवळील धबधबा परिसरात पुन्हा एकदा गेल्या तीन-चार दिवसांपासून भर लोकवस्तीजवळ एका बिबट्याची दहशत सुरू असून, बिबट्याकडून कुत्र्यांना फस्त करण्याचे सत्र सुरू आहे. बिबट्याच्या दहशतीमुळे लोक भयभीत झाले आहेत.

दरम्यान, बिबट्याच्या दहशतीसंबंधी वन खात्याला कल्पना देण्यात आली असून, बिबट्याला पकडण्यासाठी वन खात्याने हालचाली सुरू केल्या आहेत, अशी माहिती मिळाली आहे. धबधबा भागात रात्रीच्यावेळी लोकवस्तीजवळ फिरताना काहीजणांना या बिबट्याचे दर्शन झाले आहे.

दोन दिवसांपूर्वी रात्रीच्यावेळी प्रभू नामक व्यक्तीच्या घराजवळ या बिबट्याने एका कुत्र्यावर हल्ला करून त्याला फस्त करण्याची घटना घडली आहे. हल्ला करतानाचे हे दृश्‍य सीसीटिव्ही कॅमेऱ्यातही कैद झाले आहे, अशी माहिती स्थानिकांकडून मिळाली आहे.

बिबट्यांच्या अधिवासाच्या खाणाखुणा

यापूर्वी गेल्या जानेवारी महिन्यात आणि त्याच्यापूर्वी मिळून वर्षभरात धबधबा परिसरात दोन बिबटे पकडण्यात वन खात्याला यश आले होते. दोन बिबटे पकडूनही गेल्या जानेवारी महिन्यात काही दिवस धबधबा परिसरात आणखी एका बिबट्याचा संचार होता. आता पुन्हा एकदा या भागात बिबट्या असल्याच्या खाणाखुणा आढळून आल्या आहेत.

काही दिवसांपूर्वी शहरातील कृष्णानगर परिसरात बिबट्याचा संचार होता. महिन्यापूर्वी शहरातील व्हाळशी येथील संकल्प गार्डन वसाहतीत तेथील रहिवाशांना बिबट्याचे दर्शन झाले होते. सहा महिन्यांपूर्वी साष्टीवाडा-बोर्डे येथे कारची धडक बसून एक बिबट्या जखमी झाला होता. गेल्यावर्षी लामगाव परिसरात बिबट्याने दहशत घातली होती.