डिचोली: डिचोली शहरातील लामगाव येथील वीज खात्याची निवासी इमारत दिवसेंदिवस ढासळत असून, ती अखेरच्या घटका मोजत आहे. ही इमारत मोडून त्याजागी नवीन इमारत बांधण्याचा वीज खात्याचा प्रस्ताव आहे.

गेल्या एप्रिल महिन्यात वीजमंत्री सुदिन ढवळीकर भूमिगत वीजवाहिनी कामाच्या पायाभरणीनिमित्त डिचोलीत आले होते. त्यावेळी त्यांनी कमकुवत आणि विनावापर असलेली इमारत जमीनदोस्त करून त्याजागी सुमारे १० कोटी रुपये खर्चून वीज खात्याच्या कार्यालयासाठी सुसज्ज नवीन इमारत बांधण्यात येणार आहे, अशी घोषणा केली होती. मात्र, अजूनतरी हा प्रस्ताव मार्गी लागलेला नाही.

मिळालेल्या माहितीनुसार, केवळ निधी मंजूर झाला नसल्याने नवीन इमारतीचा प्रस्ताव रेंगाळत पडला असल्याचे समजते. एकदा काय वित्त खात्याकडून नवीन इमारतीच्या प्रस्तावाला मान्यता मिळाली की, नियोजित इमारतीची पायाभरणी करण्यात येणार आहे.

रात्रीच्यावेळी या इमारतीत अनैतिक धंदे चालतात, अशी माहितीही लामगाव येथील काही नागरिकांनी दिली. या इमारतीत निर्माण झालेली अस्वच्छता पाहता, रोगराई पसरण्याची भीतीही वर्तविण्यात येत आहे. या इमारतीची देखभाल करण्याकडे आतापर्यंत वीज खात्याचे पूर्णपणे दुर्लक्ष झाले आहे.

इमारत ढासळतेय..!

गेल्या २५ वर्षांहून अधिक काळ बंद असलेली लामगाव येथील वीज खात्याची निवासी इमारत पूर्णत: मोडकळीस आली आहे. या इमारतीत पूर्वी वीज खात्याचे कर्मचारी राहत होते. मात्र, देखभाल करण्याकडे दुर्लक्ष झाल्याने वीज उपकेंद्र कार्यालय परिसरात असलेल्या या इमारतीची मोठ्या प्रमाणात पडझड झाली आहे. ही इमारत जवळपास कोसळल्यातच जमा आहे. इमारतीला वेली-झुडपांनी वेढले असून, आत सापांचाही वावर असल्याची माहिती समोर आली आहे.