Bicholim: ..अचानक बँकेचा 'सायरन' वाजू लागला! पोलीस, अग्निशमनची उडाली धावपळ; कारण बघून जीव पडला भांड्यात

डिचोली : भर बाजारात टाकाऊ टायर पेटल्यानंतर बँकेचा ‘सायरन’ वाजू लागल्याने अग्निशमन दल आणि पोलिस यंत्रणेला धावपळ करावी लागली. आग वेळीच नियंत्रणात आणल्याने मोठा अनर्थ टळला खरा, मात्र ‘सायरन’ वाजतच राहिला. अखेर जवळपास तासाभराच्या प्रयत्नांनंतर पोलिसांनी ‘सायरन’ यंत्रणा बंद करण्यात यश मिळवल्यानंतर सर्वांचा जीव भांड्यात पडला. ही घटना सोमवारी (ता.१५) पहाटे पावणेसहा वाजण्याच्या सुमारास डिचोलीच्या बाजारात घडली.

यासंबंधीची माहिती अशी की, बाजारातील एका रोडवेज कंपनीच्या आस्थापनासमोर पडून असलेल्या टाकाऊ टायरला अचानक आग लागली. टायरने पेट घेताच निर्माण झालेला धूर बाजूला असलेल्या बँक ऑफ इंडियाच्या शाखेत बसविलेल्या ‘सायरन’च्या ‘स्मोक नियंत्रण’ यंत्रणेत धूर गेल्याने सायरन वाजू लागला.

आगीची आणि सायरन वाजत असल्याची माहिती मिळताच, डिचोली अग्निशमन दलाचे जवान आणि पोलिस घटनास्थळी दाखल झाले. या प्रकारामुळे धावपळ सुरू झाली. अग्निशमन दलाचे लिडींग फायर फायटर महेश नाईक यांच्या मार्गदर्शनाखाली दलाच्या जवानांनी टायर लागलेली आग नियंत्रणात आणली. मात्र, बँकेचा सायरन वाजतच होता. तो नंतर बंद करण्यात आला.

दरम्यान, टायरला आग नेमकी कशी लागली ते समजू शकले नाही. मात्र ‘सायरन’ वाजला नसता, तर आगीची कल्पना आली नसती आणि एखादेवेळी अनर्थ घडण्याची शक्यता नाकारता येत नव्हती.

पोलिसांसमोर अडचण

बँक बंद असल्याने व बँकेच्या अधिकाऱ्यांशी संपर्क होऊ शकला नाही. त्यामुळे पोलिसांसमोर अडचण निर्माण झाली. मात्र, पोलिसांनी तांत्रिक माहितीच्या आधारे ‘सायरन’ बंद करण्यात यश मिळवले. त्यामुळे जवळपास तासभर चाललेली धावपळ थांबली.