डिचोली: येथील ''नवा सोमवार'' फेरीत उघड्यावर ‘गोबी मंचूरियन’ विक्री करण्यावर घातलेली बंदी यंदा यशस्वी झाली.''एफडीए'' आणि पालिकेतर्फे कडक कारवाई होण्याची शक्यता गृहीत धरून यंदा ''नवा सोमवार'' उत्सवाच्या फेरीत ‘गोबी मंचूरियन’ खाद्यपदार्थ विकण्याचे धाडस संबंधित व्यावसायिकांनी केले नाही. त्यामुळे यंदा रात्रीपर्यंत ''नवा सोमवार''ला ''गोबी''चे स्टॉल दिसून आले नाहीत.

अन्न आणि औषध प्रशासनाने ''नवा सोमवार''च्या फेरीत उघड्यावर ‘गोबी मंचूरियन’ क्रीला बंदी आणली होती. ''गोबी''सह खाद्यपदार्थाचा परवाना नसलेल्या व्यवसायिकांना स्टॉल घालण्यास परवानगी देऊ नये, अशी सूचना ''एफडीए''ने डिचोली पालिकेला केली होती.

संबंधित व्यावसायिकांना याची माहिती मिळाल्यानंतर आणि यापुर्वी झालेली कारवाईच्या पार्श्वभूमीवर व्यावसायिकांनी यंदा धोका पत्करला नाही. रात्री उशिरापर्यंत या व्यावसायिकांनी ‘गोबी मंचूरियन’ करण्याचे टाळले. गेल्या वर्षीही नवा सोमवारच्या फेरीत ‘गोबी मंचूरियन’ला बंदी घातली होती.

मात्र मध्यरात्रीनंतर ‘गोबी मंचूरियन’चा व्यवसाय तेजीत झाला होता. गेल्या दोन वर्षाप्रमाणे पुनरावृत्ती होता कामा नये. यासाठी ''एफडीए''ने कडक भुमिका घेतली होती. बंदी घालताना दंडात्मक कारवाई आणि साहित्य जप्त करण्याची तयारीही संबंधित यंत्रनेने ठेवली होती. एफडीए आणि पालिकेचे अधिकारी रात्री उशिरापर्यंत फेरीवर लक्ष ठेवून होते.

‘गोबी मंचूरियन’ला बंदी घातल्याने ''नवा सोमवार''च्या फेरीत ते स्टॉल घालण्यात आले नाहीत. त्यामुळे खवय्यांना भेलपुरी आदी खाद्यपदार्थांवर रुच भागवावी लागली. ''गोबी'' नसली तरी अन्य खाद्यपदार्थ करून या व्यावसायिकांनी आपला गल्ला केला. येथील छत्रपती शिवाजी महाराज सर्कलजवळ पारंपरिक जागेत दरवर्षी चार ते पाच ‘गोबी मंचूरियन’चे स्टॉल दिसून येत होते. यंदा मात्र ते दिसून आले नाहीत.