Bicholim Factory Explosion : 

डिचोली, पोलाद उत्पादन करणाऱ्या कारखान्यातील स्फोटांच्या दुर्घटनेनंतर परिस्थिती हळूहळू नियंत्रणात येत असली, तरी कारखाना परिसरात अजूनही भयावह स्थिती आहे.

या दुर्घटनेत कारखान्यातील मालमत्तेची हानी वगळता अन्य कोणतीच दुर्घटना घडली नसली, तरी स्फोटांच्या हादऱ्याने भयभीत झालेल्या जनतेचे भय मात्र अद्याप संपलेले नाही.

या दुर्घटनेच्या पार्श्वभूमीवर सरकारी अधिकाऱ्यांसह आमदार डॉ. चंद्रकांत शेट्ये आणि प्रेमेंद्र शेट यांनी आज दुपारी कारखान्याला भेट देऊन दुर्घटनेची सखोल चौकशी करण्याचे आदेश अधिकाऱ्यांना दिले आहेत. तोपर्यंत कारखाना बंद ठेवण्याचे आदेश देण्यात आले आहेत. दुसऱ्या बाजूने संबंधित कारखान्याच्या मालकावर गुन्हा नोंद करून त्यांना अटक करा. अशी मागणी स्थानिकांनी केली आहे.

वाठादेव-डिचोली येथील हा कारखाना सर्वांत जुना आहे. सुरवातीस ‘रोलिंग मिल’ या नावाने तो ओळखण्यात येत होता. कालांतराने या कारखान्याचे नाव बदलून ‘ऑरेंज फॉरेस्ट’ करण्यात आले. आता तर त्याचे ‘कैराव’ असे नामकरण करण्यात आले आहे. गेल्या काही वर्षांपासून प्रदूषणामुळे हा कारखाना वादात अडकला होता. धूर प्रदूषणामुळे त्रस्त नागरिकांनी कारखाना बंद ठेवणे भाग पाडले होते. नंतर उपाययोजना केल्यानंतर हा कारखाना पुन्हा सुरू झाला होता. आता कारखान्यात स्फोट झाल्याने सुरक्षेचा प्रश्न निर्माण झाला आहे.

गुन्हा नोंद करण्याची मागणी

कालची दुर्घटनेमुळे कारखान्याचा निष्काळजीपणा उघड झाला आहे. भविष्यात मोठी दुर्घटना घडून जीवितहानी होण्याची शक्यता नाकारता येत नाही. तशी भीती उपस्थित नागरिकांनी व्यक्त केली. संबंधित मालकांविरूद्ध गुन्हा नोंदवून अटक करा, अशी मागणी वितेंद्र गोवेकर आदी नागरिकांनी केली.