डिचोली: भर ‘चतुर्थी’च्या तोंडावर नळ कोरडे पडल्याने डिचोलीतील विविध भागात (शुक्रवारी) दिवसभर पिण्याच्या पाण्याची तीव्र समस्या निर्माण झाली. सर्वत्र चतुर्थीच्या तयारीची लगबग सुरू असतानाच, दिवसभर पाण्याची समस्या निर्माण झाल्याने विविध भागातील लोकांवर विशेष करून गृहिणींची गैरसोय झाली.

उपलब्ध माहितीनुसार, पडोसे जलशुद्धीकरण प्रकल्पात तांत्रिक बिघाड झाल्याने पाणीपुरवठ्यावर परिणाम झाला. त्यामुळे जलशुद्धीकरण प्रकल्पाच्या कार्यक्षेत्रात येणाऱ्या भागात मात्र पाण्याची समस्या निर्माण झाली. दिवसभर घरगुती नळ कोरडे राहिल्याने गृहिणींवर पाण्यासाठी अश्रू गाळण्याची वेळ आली. साफसफाई आदी चतुर्थीच्या तयारीची कामे खोळंबून पडली.

दरम्यान, शुक्रवारी सायंकाळपर्यंत नळाद्वारे पाणीपुरवठा सुरळीत होणार, अशी माहिती पडोसे जलशुद्धीकरण प्रकल्पातील सूत्रांनी दिली होती. मात्र, सायंकाळी उशीरापर्यंत नळ कोरडेच राहिले होते. रात्री उशिरापर्यंत बिघाड दूर करण्यात यश आले नव्हते. त्यामुळे नळ कोरडेच होते. मुळगाव, मये आदी काही भागात तर कालपासून नळ कोरडे आहेत, अशी माहिती मिळाली आहे.

नळांना पाणी नसल्याने डिचोली शहरातील बोर्डे आदी काही भागात तसेच तालुक्यातील कारापूर, सर्वण, वन, मुळगाव, मये आदी बहुतेक भागातील लोकांची धांदल उडाली. ऐन चतुर्थीच्या तोंडावर नळ कोरडे राहिल्याने आमचे अक्षरशः हाल झाले आहेत, अशी व्यथा बोर्डे येथील मीनाक्षी सातार्डेकर यांच्यासह अन्य गृहिणींनी मांडली.