डिचोली: दिवाळीच्या उत्साहात डिचोलीत घडलेल्या भीषण अपघातात कुडचिरे येथील तन्मय खरवत (२२) या युवकाचा मृत्यू झाला. शुक्रवारी मध्यरात्री श्री शांतादुर्गा विद्यालयासमोरील बगलमार्गावर हा अपघात घडला. तन्मयच्या मृत्यूमुळे कुडचिरे गावावर शोककळा पसरली आहे.

मिळालेल्या माहितीनुसार, तन्मय हा आपल्या स्कुटरवरून घरी जात असताना विद्यालयासमोरील बगलमार्गावर त्याचे वाहनावरील नियंत्रण सुटले. त्यामुळे स्कुटर रस्त्याच्या विभाजकाला धडकली. या धडकेत त्याच्या डोक्याला गंभीर दुखापत झाली.

अपघातानंतर त्याला तातडीने डिचोली सामाजिक आरोग्य केंद्रात दाखल करण्यात आले. प्राथमिक उपचारांनंतर पुढील उपचारांसाठी गोवा वैद्यकीय महाविद्यालयात (गोमेकॉ) हलविण्यात आले. मात्र, उपचार सुरू असताना शनिवारी पहाटे त्याची प्राणज्योत मालवली.

तन्मय हा डिचोली औद्योगिक प्रशिक्षण संस्थेचा (आयटीआय) प्रशिक्षणार्थी होता. तसेच एका जिममध्ये अर्धवेळ प्रशिक्षक म्हणून काम करीत होता. त्याच्या वडिलांचे हॉटेलमध्ये वेटर म्हणून काम असून, कुटुंबाची आर्थिक परिस्थिती बेताची असल्याची माहिती मिळाली आहे. दिवाळीच्या तोंडावर घडलेल्या या घटनेने परिसरात हळहळ व्यक्त होत आहे. डिचोली पोलिसांनी पंचनामा करून पुढील तपास सुरू केला आहे.