Bicholim News : डिचोली, ‘व्हडली दिवाळी’ अर्थात तुळशी विवाह कार्तिकी द्वादशीला म्हणजेच उद्या शुक्रवारी सर्वत्र साजरा करण्‍यात येणार आहे.

तुळशी विवाहाला अवघेच क्षण बाकी असल्याने सध्या डिचोलीत सर्वत्र या सोहळ्याची ‘लगीनघाई’ सुरु झाली आहे. तुळशी विवाहासाठी लागणारे साहित्यही बाजारात दाखल झाले असून, खरेदीची लगबग सुरू झाली आहे. कार्तिकी द्वादशीपासून पाच दिवस तुळशी विवाह लावण्याची परंपरा असली तरी बहुतांश भागात कार्तिकी द्वादशीला तुळशीची लग्ने लावतात.

तुळशी विवाहानिमित्त तुळशी वृंदावने नववधूप्रमाणे सजू लागली आहेत. घरोघरी तुळशी वृंदावनांना नवा साज येऊ लागलाय. तुळशीवृंदावने रंगविण्याचे काम जोरात सुरू आहे. काही ठिकाणी हे काम पूर्ण झाले आहे. सिमेंटच्या रेडिमेड तुळशीही बाजारात विक्रीस उपलब्ध झाल्या आहेत.

साहित्य बाजारात दाखल

तुळशी विवाह म्हटल्याबरोबर विवाहासाठी ऊस, चिंच, आवळे, दिणा आदी पारंपरिक साहित्य आवश्यक असते. हे साहित्य आता बाजारात दाखल झाले आहे. कर्नाटक भागातून ऊसही दाखल झाला आहे. उद्या शुक्रवारी खरेदीला आणखी जोर येणार आहे.

दरवर्षीप्रमाणे यंदाही चिंच, आवळ्याची फांदी महाग आहे. आवळ्यांचा तर तुटवडा जाणवतोय. तुळशी विवाहासाठी लागणारे साहित्य ग्रामीण भागात सहज उपलब्ध होत असते. तरीसुद्धा एकाच ठिकाणी सर्व साहित्य मिळत असल्याने बाजारात या साहित्याला प्रचंड मागणी आहे.