डिचोली: बाजारातील ‘त्या’ जीर्ण व धोकादायक जिन्याखालील स्टॉलधारकांना हटविण्याची मोहीम पालिकेने शुक्रवारपासून हाती घेतली आहे. या मोहिमेंतर्गत सायंकाळी तीन स्टॉल हटवून त्यांना सार्वजनिक गणपती पूजन मंडपात स्थलांतरित करण्यात आले.

मात्र, गणपती पूजन मंडपात स्टॉल थाटण्यास गणेशोत्सव मंडळाने हरकत घेतल्याने हे स्टॉलधारक सध्या वाऱ्यावर पडल्यात जमा झाले आहेत.

गणपती पूजन मंडपात स्टॉल घालण्यास हरकत घेतल्यानंतर अस्वस्थ झालेल्या स्टॉलधारकांनी अखेर आपले साहित्य पुन्हा पूर्वीच्याच जागेत आणून ठेवले. पर्यायी जागा मिळत नाही, तोपर्यंत सध्याची जागा सोडायची नाही, असा पवित्रा या स्टॉलधारकांनी घेतला आहे. त्यामुळे या प्रश्नावरून गोंधळ निर्माण होण्याची शक्यता वाढली आहे. याप्रकरणी पालिका आता कोणती भूमिका घेते, याकडे बाजारकरांचे लक्ष लागून राहिले आहे.

जीना कोसळण्याच्या अवस्थेत

धोकादायक जिन्याखाली दोन्ही बाजूंनी मिळून आठ स्टॉल आहेत. जवळपास ४४ वर्षांपूर्वी बांधण्यात आलेल्या पालिकेच्या पहिल्या बाजार प्रकल्पासाठी दोन्ही बाजूंनी जिन्यांची व्यवस्था करण्यात आली आहे.

मात्र, चौथ्या टप्प्यातील मार्केट प्रकल्पाला लागून असलेला ‘जीना’ आता अत्यंत जीर्ण झाला असून, तो कोणत्याही क्षणी कोसळण्याची शक्यता नाकारता येत नाही. त्यामुळे त्याठिकाणी लोखंडी ‘जीना’ बांधण्याच्या हालचाली सुरू झाल्या आहेत. आठ दिवसांपूर्वी आमदार डॉ. चंद्रकांत शेट्ये यांनी अधिकाऱ्यांसह संबंधित जिन्याची पाहणी केली होती.

स्टॉलधारकांची धावपळ

जिन्याखाली नोटीस लावून शुक्रवारी सायंकाळी पालिकेच्या अधिकाऱ्यांनी साहित्य हटविण्याचे आदेश स्टॉलधारकांना दिले व स्टॉल काढण्यास सुरुवात केली. त्यामुळे स्टॉलधारकांची धावपळ सुरू झाली. तीन स्टॉलधारकांनी आपले साहित्य गणपती पूजन मंडपात स्थलांतरित केले.

दरम्यान, गणेशोत्सव मंडळाच्या पदाधिकाऱ्यांनी गणपती पूजन मंडपात ठेवलेले साहित्य हटविण्यास संबंधित स्टॉलधारकांना भाग पाडले. तोपर्यंत पालिकेचे अधिकारी व कर्मचारी निघून गेले होते.