मडगाव: खणगिणी-बेतूल येथे दारूच्या नशेत पोलिसांवर हल्ला चढविणाऱ्या त्या सहा संशयितांना अधिक तपासासाठी चार दिवसांची  पोलिस कोठडी घेण्यात  आली आहे. त्यांची सध्या कसून चौकशी सुरू आहे. दरम्यान, या हल्ल्यात जखमी झालेले पोलिस अनुप कावरेकर यांची प्रकृती सुधारत असून,  त्यांच्यावर  दक्षिण  जिल्हा इस्पितळात उपचार सुरू आहेत.  

जेबियार डुंग डुंग (२१), सुरेश हरिया (२१), राहुल किसन (२३) व अमित लोहरा  (२५),  संदीप तिरके (३०) व समीर तिरके (२१) अशी संशयितांची नावे आहेत. ते सर्वजण झारखंड राज्यातील आहेत. 

बेपत्ता असलेल्या दोघांना शोधण्यासाठी कुंकळ्ळी पोलिस ठाण्याचे पोलिस शिपाई साईराज नाईक व  अनुप कावरेकर  हे बेतूल येथे गेले होते. त्यावेळी संशयित उघड्यावर दारू पीत बसले होते. पोलिसांनी त्यांना हटकून  जाब विचारला असता, पोलिसांवरच त्यांनी हल्ला चढविला होता.

दगड भिरकावून तसेच लाथाबुक्क्यांनी मारहाण केली होती. या सर्व संशयितांवर   भारतीय न्याय संहितेच्या कलम १०९, १३२, १८९ (२), १९१ (३) अंतर्गत गुन्हा नोंद केला आहे. पोलिस निरीक्षक डायगो ग्रासियस यांच्या मार्गदर्शनाखाली उपनिरीक्षक किशोर वेळीप पुढील तपास करीत आहेत.