फोंडा: बेतोडा कोनशे कोडार निरंकाल पंचायत क्षेत्रात बेकायदा प्लॉट तयार करण्याबरोबरच इतर गैर कृत्ये चालली असून संबंधित सरकारी यंत्रणेने त्याची चौकशी करावी अशी मागणी बेतोडा भागातील ग्रामस्थांनी पत्रकार परिषदेत केली आहे. यावेळी देवेंद्र च्यारी, धर्मानंद च्यारी, ज्ञानेश्‍वर खांडेपारकर व इतर ग्रामस्थ उपस्थित होते.

बेतोडा भागातील एका जमिनीत झुडपे कापणे तसेच सिमेंटचे खांब उभारण्यासाठी पंचायतीकडे संबंधिताने परवानगी मागितली होती, पण प्रत्यक्षात या ठिकाणी प्लॉट तयार करून ते विकण्यात आले. यासंबंधीची तक्रार पंचायतीत करण्यात आली आहे, पण अपेक्षित कारवाई झालेली नाही, असे यावेळी सांगण्यात आले. पूर्ण पंचायत मंडळच या गैरकृत्यात गुंतल्याचा दावा करण्यात आला.

नाला बुजवून बांधकाम!

बेतोडा भागातील एक नाला बुजवून बांधकाम सुरू असून पावसाळ्यात या ठिकाणी पाणी इतरत्र घुसून पूरसदृश्य स्थिती निर्माण होण्याची शक्यता आहे. या कामामुळे मोठी समस्या निर्माण होणार असल्याचा दावा करण्यात आला. पंचायत क्षेत्रात काही ठिकाणी बेकायदेशीर घरक्रमांक देण्यात आले आहेत, त्याचीही चौकशी करण्यात यावी असे सांगून ग्रामसभेत यासंबंधी वेळोवेळी आवाज उठवण्यात येतो, पण अपेक्षित प्रतिसाद मिळत नसल्याचे ग्रामस्थांनी सांगितले.