म्हापसा: कुत्र्याला दुचाकीला बांधून फरफटत नेल्याची एक धक्कादायक आणि चीड आणणारी घटना आसगाव येथे दोन दिवसांपूर्वी उघडकीस आली. याबाबतचा एक व्हिडिओ समाज माध्यमांवर व्हायरल झाल्यानंतर सर्व स्तरातून संतप्त प्रतिक्रिया समोर आल्या. पोलिसांनी देखील या घटनेची दखल घेऊन कर्नाटकच्या व्यक्तीला प्राण्याप्रती क्रूरता केल्याप्रकरणी अटक केलीय.

अशोक पन्हाळकर (रा. घाटेश्वरनगर, खोर्ली मूळ बेळगाव - कर्नाटक) असे अटक करण्यात आलेल्या व्यक्तीचे नाव आहे.

संशयिताने कुत्र्याला दुचाकीच्या मागे दोरीने बांधून घाटेश्वर उतारावरुन फरफटत नेले. फरफटत घेऊन जात असताना कुत्रा जिंवत होता का मृत याबाबत माहिती मिळालेली नाही. पण, या व्यक्तीने कुत्र्याचा मृतदेह पुढे आसगाव येथे रस्त्यालगत फेकून दिली.

संशयित कुत्र्याला फरफटत घेऊन जात असताना एकाने याबाबतचा व्हिडिओ शूट करुन तो समाज माध्यामांवर प्रसिद्ध केला. व्हिडिओ व्हायरल झाल्यानंतर समाजातून संतप्त प्रतिक्रिया समोर येऊ लागल्या.

म्हापसा पोलिसांनी या घटनेचे गंभीर दखल घेऊन बेळगाव, कर्नाटकच्या रहिवाशाचा शोध सुरु केला. व्हिडिओतून समोर आलेल्या माहिच्या आधारे पोलिसांनी व्यक्तीला शोधून काढत प्राण्यांशी क्रूरता केल्याप्रकरणी अटक केली आहे.