Anmod Ghat Belagavi - Goa Road

रामनगर: अनमोड घाटातील वाहतूक कोंडी तब्बल १७ तासानंतर फुटली असून, गोवा - बेळगाव मार्ग वाहतुकीस खुला झाला आहे. रामनगर येथील घाटात वळणावर रविवारी सांयकाळी साडे पाचच्या सुमारास संरक्षक कठड्याला धडकून ट्रकचा अपघात झाला.

यानंतर घाटात मोठी वाहतूक कोंडी निर्माण झाली. अखेर १७ तासांनंतर मार्ग वाहतुकीस खुला करण्यात आला आहे.

ट्रकचा पाटा तुटल्याने नियंत्रण सुटलेला ट्रक संरक्षक कठड्याला जाऊन धडकला. यामुळे मार्गावर वाहतूक कोंडी झाली. दोन्ही बाजुला वाहनांच्या लांबच लांब रांगा पाहायला मिळाल्या. रामनगर पोलिसांनी क्रेनच्या मदतीने मार्गावर अडकून पडलेला ट्रक हटवला अखेर १७ तासांनी मार्गावरील वाहतूक सुरु झाली आहे.

रविवारी सायंकाळी साडे पाचच्या सुमारास हा अपघात झाला. त्यानंतर सुमारे पाच तास वाहने जागच्या जागी उभी होती. अखेर रात्री साडे दहा नंतर हळुहळू एक - एक वाहन सोडण्यात आले. वाहतूक कोंडी फोडण्यासाठी वाहतूक पोलिस रात्रभर प्रयत्न करत होते. अखेर दुपारी या प्रयत्नांना यश आले.

अनमोड घाट प्रवासाचा एक प्रमुख मार्ग (Anmod Ghat)

बेळगाव - गोवा मार्गावर रामनगर येथे अनमोड घाट येतो. कर्नाटक आणि गोव्याला जोडणारा हा एक प्रमुख मार्ग आहे. मार्गावर नेहमीच वर्दळ पाहायला मिळते. घनदाट झाडीचा प्रदेश, नागमोडी वळणे आणि रुंदीने छोटा असणारा मार्ग यामुळे या भागात वारंवार अपघाताच्या घटना पाहायला मिळतात.