पणजी: राज्यातील विधानसभेची मतमोजणी उद्या 10 मार्चला होणार आहे. यानिमित्त गुरुवारी राज्यभरात मद्यविक्री बंदीचा आदेश लागू केला आहे. ही बंदी मतमोजणी सुरू असेपर्यंत सुरू राहणार असल्याचे जिल्हाधिकाऱ्यांनी जारी केलेल्या आदेशात म्हटले आहे.मतमोजणी सकाळी 8 वा.पासून ते संपेपर्यंत पणजी व मडगाव येथे तसेच सर्व मतदारसंघामध्ये एकाचवेळी सुरू होणार आहे.

राज्यात या दिवशी मद्यविक्रीवर बंदी असली तरी रेस्टॉरंट्स सुरू ठेवता येतील मात्र मद्यविक्री करता येणार नाही. मतमोजणीपासून सुमारे 200 मीटर अंतराच्या क्षेत्रात कोणत्याही आस्थापनाला तसेच दुकाने खुली ठेवता येणार नाही असे आदेशात स्पष्ट करण्यात आले आहे. ही मद्यविक्री बंदी उद्या बुधवारी मध्यरात्रीपासून सुरू होणार असून ती मतमोजणी संपेपर्यंत असेल. आदेशाचे उल्लंघन करणाऱ्यांविरुद्ध कठोर कारवाई केली जाणार आहे. या मतमोजणीवेळी आल्तिनो - पणजी येथील तंत्रनिकेतन इमारतीच्या सभोवताली असलेल्या प्रवेशद्वाराबाहेर गर्दी होणार असल्याने कडक बंदोबस्त ठेवण्यात आला आहे.