पणजी : आयकर कार्यालयातील महिला कर्मचाऱ्यावरील लैंगिक अत्याचार प्रकरणातील संशयित मनिंदर अत्तारी याच्या अटकपूर्व जामीन अर्जावरील सुनावणी आज घेण्यात आली. त्यावरील निर्णय उद्या 12 मे रोजी ठेवला आहे तर इतर दोघे संशयित दीपक कुमार आणि आदित्य वर्मा यांना पोलिस स्थानकात संध्याकाळी 5 ते रात्री 8 पर्यंत उद्यापासून पाच दिवस उपस्थित राहण्याचे निर्देश देत अटकपूर्व जामीन मंजूर केला आहे.

पीडित महिलेने दिलेल्या तक्रारीत संशयित मनिंदर अत्तारी याच्याविरुद्ध लैंगिक छळ आणि सतावणुकीचे आरोप केले आहेत. यासोबतच संशयित दीपक कुमार आणि आदित्य वर्मा हे वाईट नजरेने पाहत असल्याचे आरोप केले होते. या दोघा संशयिताविरुद्ध असलेले आरोप जामीनपात्र असल्याने न्यायालयाने त्यांना शर्ती घालून जामीन मंजूर केला.

संशयित मनिंदर याच्याविरुद्धचे आरोप अजामीनपात्र असून त्याच्याविरुद्धचे पुरावे या पीडित महिलेने तक्रारीसोबत जोडले आहेत. त्यामध्ये अश्‍लिल व्हॉटस्अप मेसेज तसेच तिला कार्यालयातून घरी जाताना वाटेत अडवणे, असे आरोप करण्यात आले आहेत. प्रकरणाचा तपास प्राथमिक टप्प्यात असल्याचा तसेच सीसीटीव्ही फूटेज आणि डीव्हीआर खात्याकडून देण्यात आलेला नसल्याने अधिक चौकशीसाठी त्याची पोलिस कोठडी आवश्‍यक असल्याने जामीन दिला जाऊ नये, असा युक्तिवाद सरकारी वकिलांनी केला.