Babreshwar Temple: पोलिसांनी एकत्र येऊन एखाद्या ग्रामदेवतेला मानवंदना देणे, हे तसे नवीन नाही. मात्र, कळंगुट परिसरातील लोकांनी काल हा प्रकार पहिल्यांदाच अनुभवला. कळंगुट-बागा येथील प्रसिद्ध तसेच जागृत श्री देव बाबरेश्वरच्या जत्रोत्सवाला शनिवारपासून सुरुवात झाली.

पहिल्या दिवशी कळंगुटचे पोलिस निरीक्षक दत्तगुरू सावंत तसेच पोलिस पथकाने श्रीदेव बाबरेश्वरचरणी मानवंदना दिली. या गोष्टीचे काहींना आश्चर्य वाटू लागले आहे. मात्र, आमच्यासाठी हे आत्मबळ वाढविणारे आहे, असे पोलिसांनी सांगितले.

केळ्यांच्या घडांची जत्रा म्हणूनही हा जत्रोत्सव ओळखला जातो. कळंगुटचे आमदार मायकल लोबो यांनीही श्रीदेव बाबरेश्वराचे दर्शन घेऊन आशीर्वाद घेतले.

...अन् भाविकही भारावले

श्रीदेव बाबरेश्वरचरणी कळंगुट पोलिसांकडून मानवंदना तसेच सलामीचा रंगतदार कार्यक्रम शनिवारी सकाळी झाला‌. देवस्थानच्या इतिहासात पोलिसांकडून अशा प्रकारची मानवंदना आणि सलामी प्रथमच देण्यात आली.

यावेळी बाबरेश्वर देवाचे भक्तजन आणि भाविकही भारावले. देवस्थानचे अध्यक्ष चंद्रकांत चोडणकर यांनी पोलिस निरीक्षक दत्तगुरू सावंत आणि पोलिस पथकाचे पुष्पगुच्छ देऊन स्वागत केले.

राज्यातील विविध भागांतील जागृत देवस्थाने ही आपणा सर्वांचे राखणदार म्हणून ओळखले जातात. पोलिससुद्धा जनतेच्या संरक्षणाची हमी शिरावर घेऊन कर्तव्य बजावतात. कळंगुट पोलिसांतर्फे श्रीदेव बाबरेश्वरचरणी देण्यात आलेली सलामी ही आम्हा स्थानिक पोलिस दलासाठी आत्मबल वाढविणारी गोष्ट आहे. -दत्तगुरू सावंत, पोलिस निरीक्षक.