Attack after Accident : म्हापसा येथील नवीन बसस्थानकावर भाडे सोडायला आलेल्या पिता-पुत्रावर जीवघेणा हल्ला केल्याने दोघेही जखमी झाले. चंद्रकांत शिरोडकर व पुत्र ब्रिजेश शिरोडकर (दोघेही रा. कांदोळी) अशी जखमींची नावे आहेत. किरकोळ अपघाताच्या कारणास्तव हा सुरीहल्ला करण्यात आला आहे. याप्रकरणी म्हापसा पोलिसांनी समीर पेडणेकर (38) व सुरेश कुंभार (38) या दोघा खोर्ली-म्हापसा येथील संशयित युवकांना अटक केली.

उपलब्ध माहितीनुसार, ही घटना शुक्रवारी (28 ऑक्टोबर) सायंकाळी 4 च्या सुमारास घडली. जखमी चंद्रकांत शिरोडकर व पुत्र ब्रिजेश शिरोडकर (रा. बामणवाडा - कांदोळी) हे आपल्या पर्यटक टॅक्सीतून म्हापसा येथे नवीन कदंब बसस्थानकावर पर्यटकांना सोडण्यासाठी आले होते.

यावेळी संशयितांनी अचानक आपली दुचाकी शिरोडकर पिता-पुत्राच्या कारसमोर घेतली. त्यामुळे कारची धडक या दुचाकीला बसली. यावेळी संशयितांनी त्यांना शिवीगाळ करत नुकसान भरपाईची मागणी केली व समीर पेडणेकर याने ब्रिजेश शिरोडकर याच्यावर सुरीहल्ला केला. त्याच्या छातीवर व तोंडावर सुऱ्‍याचे घाव पडले, तर मुलाला वाचविण्यासाठी आलेल्या चंद्रकांत शिरोडकर यांच्या पाठीवरही संशयितांनी सुऱ्याचे वार केले व तेथून पोबारा केला.

या घटनेची माहिती मिळताच पोलिसांनी घटनास्थळी धाव घेतली व जखमींना उपचारासाठी जिल्हा इस्पितळात नेले. तेथे त्यांच्यावर उपचार करून घरी पाठविण्यात आले.

दोघा संशयितांना अटक

जखमी ब्रिजेश याच्या तक्रारीनुसार पोलिसांनी भादंसंच्या 341, 504, 427, 506(2), 307 व 34 कलमान्वये गुन्हा नोंद केला. या गुन्ह्याखाली दोन्ही संशयितांना पकडून अटक करण्यात आली. पुढील तपास पोलिस उपनिरीक्षक सुनील पाटील हे करीत आहेत.