पणजी: अटलसेतू (Atalsetu) या वर्षी 31 डिसेंबरपर्यंत पूर्णतः कार्यरत होणार आहे. सध्या मेरशी सर्कल ते पणजी उड्डाणपुलाचे बांधकाम अपूर्ण असल्याने सेतूचे काम प्रलंबित आहे. हे लवकरच पूर्ण केले जाणार आहे, असे लेखी उत्तर मुख्यमंत्री डॉ. प्रमोद सावंत (CM Pramod Sawant) यांनी विधानसभेत दिले. आमदार दिगंबर कामत (MLA Digambar Kamat) यांनी अटलसेतू विषयी अतारांकित प्रश्न विचारला होता.

अटल सेतू उभारण्यासाठी सुमारे 596.46 कोटी रुपये खर्च आला असून, खड्डे वगळता पुलावर इतर त्रुटी नसल्याचे मुख्यमंत्र्यांनी उत्तरात म्हटले आहे. कामत यांनी अटल सेतूची सविस्तर माहिती मागितली होती. त्यात पुलाचा भाग असलेल्या उड्डाणपुलांचा समावेश होता.

नोव्हेंबरमध्ये होणार पुन्हा डांबरीकरण

अटल सेतूवरील रस्त्याला पडलेले खड्डे (Pathholes) हे गंभीर समस्या असून या वर्षी नोव्हेंबरमध्ये रस्त्याचे पुन्हा नव्याने डांबरीकरण केले जाईल, अशी माहिती सार्वजनिक बांधकाम मंत्री निलेश काब्राल ( Minister Nilesh Cabral) यांनी विधानसभेत दिली होती. आयआयटी मद्रासने आपल्या अहवालात पुन्हा डांबरीकरण करण्याची सूचना केली आहे. खर्च कंत्राटदाराकडून घेतला जाईल, असे काब्राल यांनी स्पष्ट केले होते.