म्हापसा: आसगाव कोमुनिदादच्या जमिनीवरील बेकायदा बांधकामे नियमित करण्यास विरोध करणे, तसेच उच्च न्यायालयात याचिका दाखल करण्याचा निर्णय घेण्यात आला आहे. कोमुनिदादच्या सर्वसाधारण सभेत हा निर्णय घेण्यात आला.

आसगाव व बादे गावातील कोमुनिदादच्या जमिनीवर बंधलेल्या बेकायदेशीर बांधकामांना नियमित करण्याबाबत गोवा विधानसभेच्या दुरूस्ती विधेयकावर चर्चा करण्यासाठी या सभेत सुमारे 40 गावकार उपस्थित होते. यावेळी जॉन पिरीस, केदार कामत व अ‍ॅड. क्लेटन फोन्सेका यांचा कोमुनिदादमध्ये योगदान दिल्या बद्दल त्यांचा सत्कार करण्यात आला.

चर्चेवेळी गावकारांनी एकत्रितपणे कोमुनिदाद जमिनीवरील बेकायदेशीर बांधकामांना नियमित करण्यास विरोध केला. सरकारने बांधकामे नियमित करण्याची मुभा अतिक्रमणकर्त्यांना दिल्यास, परिणामी अधिकाधिक बेकायदेशीर बांधकामे निर्माण होतील, असा दावा गावकारांनी यावेळी केला.

गावकारांनी कोमुनिदाद व्यवस्थापन समितीच्या निदर्शनास आणून दिले की, सरकारने अवैध बांधकामे नियमित करण्याची घोषणा केल्यानंतर जमिनीसभोवती अवैधपणे संरक्षक भिंतीचे कुंपण बांधले जात आहे. तसेच खोल्या बांधल्या जात आहेत, त्यावर कारवाईची मागणी करण्यात आली.

अ‍ॅटर्नी नेल्सन फर्नांडिस यांनी सांगितले की, कोमुनिदादच्या सर्वसाधारण सभेत आसगाव कोमुनिदादच्या जमिनीवरील बेकायदेशीर बांधकामे नियमित करण्यास विरोध करणे व उच्च न्यायालयात याचिका दाखल करण्याचा निर्णय सर्वानुमते घेण्यात आला.