फोंडा: राज्यातील (goa) दूध उत्पादकांची शिखर संस्था असलेल्या कुर्टी-फोंड्यातील गोवा डेअरीला लागलेले शुक्लकाष्ट संपायची चिन्हे दिसत नाहीत. प्रशासकीय कामकाजातील मतभेद उघड झाल्यानंतर नव्याने करण्यात आलेली नोकरभरती आणि गेल्या सरकारच्या काळातील खोगीर भरती (Recruitment) यामुळे गोवा डेअरी (Goa Dairy) कायम चर्चेत राहिली आहे. अशा परिस्थितीत आता सहकार निबंधकांनी 2015-16 या वर्षांतील 33 कामगारांच्या नोकरभरतीसंबंधी डेअरीचे विद्यमान प्रशासकीय समितीचे अध्यक्ष दुर्गेश शिरोडकर यांच्याकडे स्पष्टीकरण मागितले आहे. विशेष म्हणजे, या सर्व 33 कामगारांना सेवेत कायम करण्यात आले आहे.

दूध उत्पादकांकडून गोवा डेअरीबद्दल कायम नाराजी आहे. दूध उत्पादकांच्या हिताच्यादृष्टीने कोणतेही निर्णय घेतले जात नाहीत असा आरोपच दूध उत्पादक करीत असून डेअरीतील नोकरभरती आणि त्यासंबंधीची प्रक्रिया यासंबंधीचा वाद कायम आहे. गेल्या काळात झालेल्या 33 कामगारांच्या नोकरभरतीचा विषय आता तापला आहे. ही नोकरभरती करताना कोणत्याही नियमांची पूर्तता करण्यात आली नाही, असा आरोप असल्याने सहकार निबंधकांनी त्यासंबंधीचे स्पष्टीकरण प्रशासकीय समितीकडे मागितले आहे.

कामगारांचा इशारा

गोवा डेअरी नफ्यात असल्याचे वारंवार सांगितले जाते, मग आम्हाला सातवा वेतन आयोग का नाही, असा सवाल या कामगार संघटनेने विचारला आहे. सातवा वेतन आयोग लागू करणे तसेच मागचा ‘डीए‘ देण्याची मागणी या संघटनेने केली यासंबंधी निर्णय न झाल्यास आंदोलनाचे अस्त्र उगारले जाईल, असे या संघटनेने म्हटले आहे.