Ashadi Ekadashi 2023 Goa Wari: येत्या 29 जून रोजी आषाढी एकादशी साजरी होणार आहे. हरिनामाच्या अखंड गजरात विविध भागातून वैष्णवांचा मेळा विठ्ठल रुक्मिणीच्या दर्शनासाठी जात आहे. गोवा, महाराष्ट्र, कर्नाटक यासह विविध राज्यातील भाविक पंढरपूरच्या दिशेने प्रस्थान करत आहेत.

गोव्यातून देखील मोठ्या प्रमाणावर वारकरी दरवर्षी लाडक्या विठुरायचे दर्शन घ्यायला जात असतात. यावर्षी देखील विविध वारकरी मंडळ पायी वारी करत पंढरपूरच्या दिशेने निघाल्या आहेत.

ॐ नमो ज्ञानेश्वर माऊली वारकरी मंडळ आमोणा गोवा यांच्या पायी वारी सोहळ्यात मुख्यमंत्री प्रमोद सावंत सहभागी झाले. सावंत यांनी वारकऱ्यांसोबत काही अंतर चालत टाळासह हरिनामाच्या जयघोषात ठेका धरला.

यावेळी पायी वारीतील नागरिकांत मोठा उत्साह दिसून आला. मुख्यमंत्री सावंत यांनी वारकऱ्यांना पुढच्या प्रवासासाठी प्रोत्साहन आणि शुभेच्छा दिल्या.

आषाढी एकादशी येत्या 29 जून रोजी साजरी होणार आहे. आषाढी एकादशीच्या निमित्ताने पहाटे मुख्यमंत्री एकनाथ शिंदे यांच्या हस्ते सपत्नीक शासकीय महापूजा होणार आहे. पंढरपूरच्या श्री विठ्ठल रुक्मिणी मंदिर समितीच्यावतीने आज मुख्यमंत्री शिंदे यांना श्री विठ्ठल रुक्मिणीच्या शासकीय महापूजेचे निमंत्रण देण्यात आले.

यंदाच्या आषाढी एकादशीला सुमारे 15 लाख भाविक येण्याची शक्यता आहे. असा अंदाज व्यक्त केला जात असून, प्रशासनाच्या वतीने काळजी घेतली जात आहे.