Goa Land Grabbing Case: 'जमीन हडप प्रकरणांचा तपास करण्‍यासाठी स्‍थापन केलेल्‍या एसआयटी पथकाचे निरिक्षक सुरज सामंत यांच्‍याकडून विनाकारण सतावणूक सुरू आहे आणि वृत्तपत्रांना आपल्‍या संदर्भात खोटी माहिती पुरवतात,' अशा आशयाची तक्रार नावेली येथील व्‍यावसायिक फ्‍लायड कुतिन्‍हो यांनी केली आहे.
मागील आठवड्यात ही तक्रार दाखल करण्‍यात आली असून यात निरिक्षक सामंत यांची चौकशी करावी अशी मागणी त्यांनी केली आहे.
कुतिन्‍हो यांनी उपअधिक्षक सागर एकोस्‍कर व अन्‍य पोलिसांविरोधात यापूर्वीही प्राधिकरणाकडे अशीच तक्रार नोंदवली होती. सध्‍या या तक्रारीवर प्राधिकरणासमोर चौकशी सुरू आहे.
कुंकळ्‍ळी येथील एका जमीन हडप प्रकरणाची सध्‍या एसआयटी तपास करत असून यापूर्वी या प्रकरणातील एका संशयिताने जामिनासाठी अर्ज केला. त्‍याच्‍या जामिनाला विरोध करताना या प्रकरणातील तपास अधिकारी सामंत यांनी या जमीन हडप प्रकरणाचा कुतिन्‍हो हा मूळ सूत्रधार असे नमूद केले होते.
आता या संदर्भात प्राधिकरणासमोर तक्रार दाखल करताना कुतिन्‍हो यांनी, एका पोलीस उपअधिक्षकाच्‍या सांगण्‍यावरुन निरिक्षक सामंत आपल्‍याला खोट्या गुन्‍ह्यात अडकवू पहात आहेत असा आरोप केला आहे.
दरम्यान, आपल्‍या आरोपाच्‍या समर्थनात त्यांनी त्‍या जामिनाला विरोध करताना पोलिसांनी सादर केलेले निवेदन, संबंधितांचे कॉल रिकॉर्डिग्‍स तसेच अन्‍य मजकूर जोडला आहे. पोलीस आपल्‍याकडून पैसे उकळू पहातात असा आरोपही कुतिन्‍हो यांनी केला आहे.
'या जमीन हडप प्रकरणाशी कुतिन्‍हो यांचा संबंध असल्‍याचे पुरावे एसआयटीकडे आहेत. या प्रकरणाची सध्‍या चौकशी चालू आहे. या प्रकरणात आपण गुंतलो जाऊ शकतो, या भीतीनेच कुतिन्‍हो यांनी आपल्‍या विरोधात प्राधिकरणाकडे तक्रार केली असावी,' अशी प्रतिक्रिया निरिक्षक सामंत यांनी त्‍यांच्‍याशी संपर्क साधला असता व्‍यक्‍त केली.
यापूर्वी या प्रकरणात अटक केलेल्‍या संशयितांनी कुतिन्‍हो यांचे या प्रकरणात नाव घेतले आहे असे त्यांनी सांगितले. कुतिन्‍हो यांची पोलीस अधिक़ार्‍यांवर आरोप करणे ही नित्‍याची संवय आहे. आपल्‍यावरही त्यांनी त्‍यामुळेच तक्रार केली असावी असे सामंत यांनी सांगितले.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
