म्हापसा: सौरभ आणि गौरव लुथरा यांना गोवा पोलिसांनी ताब्यात घेतल्यानंतर प्राथमिक चौकशीवेळी पोलिसांसमोर हताश होऊन तसेच अश्रू गाळत त्यांनी आपली बाजू मांडण्याचा प्रयत्न केला. या दुर्घटनेत २५ लोक दगावल्याची आम्हाला खंत आहे. तसेच मृतांमध्ये आमच्या २० कर्मचाऱ्यांचा जीव गेला याचे दुःख अधिक आहे, असे ते म्हणाले.

लुथरा बंधूंनी चौकशीवेळी सांगितले की, आमची देशभर २४ आऊटलेट्स आहेत. हजारो कर्मचारी तिथे काम करतात. बर्च क्लबस्थळी सुरक्षेसाठी खबरदारी घ्यायला हवी होती; परंतु तसे झाले नाही. कुठेतरी दुर्लक्ष झाल्याचे लुथरा बंधूंचे मत होते.

लुथरा बंधूंनी परवाने न मिळवताच बर्च क्लब कार्यरत ठेवला. त्यामुळे हा अनधिकृत क्लब इतके महिने नक्की कोणाच्या आशीर्वादामुळे कार्यरत राहिला किंवा शासकीय कारवाईपासून कसा बचावला, हे गुपित लुथरा बंधू पोलिसांसमोर उघड करणार का, हा प्रश्‍न अनुत्तरीत आहेत. गोवा पोलिस लुथरा बंधूंच्या तोंडून, सत्य वदवून घेणार का किंवा सरकारी बाबू अथवा लोकप्रतिनिधींची नावे समोर येणार का, याकडे अनेकांचे लक्ष लागून राहिले आहे.

दरमहा लाखोंचा हफ्ता

काहींच्या मते, क्लबतर्फे महिन्याला २५ लाख रुपये हफ्ता दिला जायचा. परंतु, पोलिस किंवा दंडाधिकाऱ्यांनी याचा तपास केला आहे का, हे तपास अहवालातूनच समजेल. खात्रीलायक सूत्रांच्या मते, बर्च दुर्घटनेत अनेकांचे हात बरबटलेत. कारण अनेकांनी क्लबकडून येनकेन प्रकारेण स्वतःचा आर्थिक लाभ करून घेतला असल्याचे बोलले जात आहे.

अनेकांचे हात बरबटलेले...

सध्या दंडाधिकारी तसेच हणजूण पोलिस आपल्या परीने या प्रकरणाचा सखोल तपास करताहेत. अनेकांचे जबाब नोंदविणे सुरू आहे. यामध्ये शासकीय अधिकाऱ्यांपासून लोकप्रतिनिधींचा समावेश आहे. काहींनी तपासात सहकार्य केले, तर काहींनी सारवासारव केली. आता दुर्घटनाग्रस्त बर्च क्लबकडून हफ्ते दिले जात होते, असे आरोप होताहेत. विरोधकांनी हा विषय लावून धरला आहे.