तिसवाडी: चोडण धक्क्यावरून आज पहाटे फेरीबोट सोडण्यास डिझेल भरण्याची सबब देऊन रायबंदरकडे सोडण्यास फेरीबोट कप्तानाने नकार दिल्याचा व्हीडिओ समाजमाध्यमात आज दिवसभर व्हायरल झाला आहे. प्रवाशांना त्रास देण्याच्या प्रकाराचा हा व्हीडिओ पाहून कर्मचाऱ्यांच्या मनमानीबद्दल सर्वत्र संतप्त प्रतिक्रिया व्यक्त होत आहेत. अशा या बेजबादार फेरीबोट कप्तानावर व कर्मचाऱ्यांवर त्वरित कारवाई करावी, अशी मागणी प्रवासी व चोडण बेटावरील लोकांकडून होत आहे

या संदर्भात या मार्गावर देखरेख करणारे नदी परिवहन खात्याचे ज्येष्ठ अधिकारी विक्रमसिंग भोसले यांना विचारले असता त्यानांही ही माहिती चोडणच्या एका व्हॉटस्‌ अप समुहावरच मिळाली असल्याचे सांगितले. यांची गंभीर दखल खात्याने घेतली असून उद्या सकाळी त्या फेरीबोट कप्तान व कर्मचाऱ्यांना चौकशीसाठी बोलावले आहे. या संदर्भात ते दोषी असल्यास त्याच्यावर कारवाई केली जाईल. खात्यात बेशिस्त चालू देणार नसल्याचे अधिकारी भोसले यांनी यांनी सांगितले.

प्राप्त माहितीनुसार आज पहाटे ५ वाजता एक प्रवासी पियेदाद नामक फेरीबोटीत आला व फेरीबोट रायबंदर वाटेवर स्पेशल फेरीबोट सोडण्याची मागणी केली. फेरीबोटीत डिझेल भरत असून विलंब लागेल, असे त्याला सांगत त्यांनी २० मिनिटे वेळ घालविल्याने व डिझेल भरण्याची कोणीही हालचाल करत नसल्याने शेवटी प्रवाशाने व्हीडिओ घेण्याचा प्रयत्न केल्यावर त्वरित फेरीबोट सोडण्यात आली. याचा व्हीडिओ व्हायरल झाल्याने लोकांत या कप्तानाबद्दल नाराजी व्यक्त होत आहे.