हरमल: हरमल पंचायत क्षेत्रातील काही स्पा आणि मसाज पार्लरमध्ये राजरोसपणे अनैतिक प्रकार सुरू असल्याचा आरोप करत ग्रामस्थांनी ते व्यवसाय पूर्णत: बंद करण्याचा महत्त्वपूर्ण ठराव आजच्या ग्रामसभेत एकमताने संमत केला. या प्रकारामुळे गावातील महिलांना प्रचंड मनस्ताप होत असून गोव्यातील नामांकित पर्यटनस्थळाची प्रतिमा मलीन होत असल्याची भावना ग्रामस्थांनी व्यक्त केली.

ग्रामसभेत स्पा व मसाज पार्लरमध्ये अनैतिक व्यवसाय चालत असल्याचा मुद्दा उपस्थित करत पंचसदस्यांनी ग्रामस्थांच्या भूमिकेला पाठिंबा दर्शविला. पीटर कार्दोझ आणि जॉकी रॉड्रिग्स यांनी हा ठराव मांडला. अशा प्रकारांचा पूर्णत: नायनाट करण्यासाठी ग्रामपंचायत, ग्रामस्थ आणि पोलिसांनी संयुक्तपणे कारवाई करावी, अशी मागणी करण्यात आली.

यावेळी झालेल्या चर्चेत टोनी डिमेलो, एडविन डिसोझा, इनासियो डिसोझा, बॉस्को फर्नांडिस, क्लाऊड फर्नांडिस, राफाएल फर्नांडिस, संतोष कोरकणकर, मॅथ्यू फर्नांडिस, हेमंत फर्नांडिस, प्रवीण वायंगणकर आदींनी सहभाग घेतला.

यापूर्वी ग्रामस्थांनी येथील मसाज पार्लरमध्ये चालणारे अनैतिक व्यवहार बंद पाडून तेथील मुलींना पोलिसांच्या ताब्यात दिले होते. याप्रकरणी काही पोलिसांवरही कारवाई झाली असून हे व्यवसाय पूर्णत: बंद करण्याची मागणी ग्रामस्थांनी केली आहे.