हरमल: रविवारी झालेली हरमल पंचायतीची ग्रामसभा अवघ्या ४० मिनिटांत आटोपल्याने ग्रामस्थांनी आश्चर्य व्यक्त केले. सभेला अल्प प्रतिसाद मिळाला.

केवळ दोन लिखित ठराव व सूचना आल्याने सभा लवकर संपली. मात्र, ऐनवेळी उपस्थित होणाऱ्या विषयांवर चर्चा करता आली नसल्याने ग्रामस्थांनी नाराजी व्यक्त केली.

सरपंच दिव्या गडेकर यांच्या अध्यक्षतेखाली झालेल्या सभेत पंचायत सचिव रजत नार्वेकर यांनी मागील सभेचे इतिवृत्त वाचून दाखविले. न्यायालयाच्या आदेशानुसार रस्त्यालगतची आस्थापने व घरांच्या नोंदींबाबतही चर्चा झाली.

नागरिक रोहित नाईक यांनी घरपट्टीचा मुद्दा उपस्थित करून, सरकारने घरांसाठी १० रुपये व आस्थापनांसाठी १५ रुपये प्रतिचौरस मीटर शुल्क निश्चित केले असताना हरमल पंचायत ४० रुपये शुल्क कोणत्या आधारावर आकारते, असा सवाल केला.

ग्रामसभेला उपसरपंच सोनाली माज्जी, पंच अनुपमा मयेकर, संतान फर्नांडिस, प्रजॉय फर्नांडिस, सुशांत गावडे, गुणाजी ठाकूर, भिकाजी नाईक, रजनी इब्रामपूरकर आदी मान्‍यवर उपस्थित होते.

वाचनालयातील कर्मचारी निरीक्षक!

ग्रामसभेसाठी केरी पंचायत वाचनालयातील कर्मचारी राजाराम मठकर यांना निरीक्षक म्हणून पाठविण्यात आल्याने ग्रामस्थांनी गटविकास खात्याच्या निर्णयावर नाराजी व्यक्त केली.