मोरजी: हरमल पंचायत क्षेत्रातील भटवाडी येथील मुख्य रस्ता हा खड्ड्यात हरवला आहे. या रस्त्याच्या दोन्ही बाजूने गटार व्यवस्थाही कोलमडून पडल्यामुळे रस्त्यावरील खड्डे दिवसेंदिवस वाढत आहेत.

या रस्त्यावरून वाहने चालवताना वाहनचालकांना कसरत करावी लागते. सरकारने आणि सार्वजनिक बांधकाम खाते रस्ता विभागाने या रस्त्याकडे अजूनपर्यंत लक्ष का दिले नाही, असा सवाल नागरिक उपस्थित करत आहेत. पावसाचे पाणी या रस्त्यावर भरून राहिल्यानंतर कुठे खड्डा आहे हे दुचाकी वाहनचालकांना कळत नाही. वा कधी-कधी अपघातही घडत असतात.

दरम्यान, काँग्रेसचे नेते देवेंद्र प्रभुदेसाई आणि त्यांच्या समर्थकांनी मांद्रे मतदारसंघातील जे रस्ते धोकादायय बनलेले आहेत, त्यांची जर १५ जुलैपूर्वी दुरुस्ती केली नाही, तर रास्ता रोको करण्याचा इशारा दिल्यानंतर पार्से येथील रस्त्याची डागडुजी सुरू केली आहे.

रस्ते खचले!

कोरगाव-भटवाडी याही ठिकाणी रस्ता मोठ्या प्रमाणात खराब झाला आहे. भूमिगत वीज केबल आणि जलवाहिनी घातल्या गेल्या, त्यावेळी व्यवस्थित दुरुस्ती न केल्यामुळे या रस्त्यांना खड्डे पडले आणि रस्ते खचत गेल्याचे चित्र दिसून येत आहे.