Calangute Land Grabbing: कळंगुट जमिन हडप प्रकरणात मामलेदार राहुल देसाई याच्यावर आणखी एक गुन्हा दाखल झाला आहे. देसाईसोबतच पोलिसांनी सँड्रिक फर्नांडिस, अंतोनिता फर्नांडिस, मारिया अँजेला फर्नांडिस यांच्यावरही गुन्हा दाखल केला आहे.

दरम्यान, तत्कालीन बार्देशचा मामलेदार राहूल देसाई हा बार्देश तालुक्यातील जमीन हडप प्रकरणातील मास्टरमाईंड असून त्याला सेवेतून निलंबित केले आहे. देसाई विरोधात यापूर्वीच एसआयटीने गुन्हा दाखल केला होता. बनावट दस्तावेज तयार करून जमीन हडप करण्याच्या प्रकरणात सुरू असलेल्या चौकशी दरम्यान एसआयटीने देसाईला ताब्यात घेत चौकशी सुरु केली होती. देसाईची अटक ही एका राजपत्रित अधिकाऱ्याला झालेली पहिलीच अटक होती. दक्षता खात्याकडून (Vigilance Department) आज निलंबनाचे आदेश जारी करण्यात आले होते.

मुरगाव तालुक्यातील 2 व 3 संयुक्त मामलेदार राहुल देसाई यांच्यावर बार्देश तालुक्यातील जमीन बळकवल्याच्या आरोपाखाली विशेष तपास यंत्रणेने यापूर्वीच जबाब नोंदविण्यात आला आहे. संयुक्त मामलेदार देसाई यांच्यावर बार्देश तालुक्यातील जमिन घोटाळ्यातील 20 पेक्षा जास्त तक्रारी म्हापसा पोलिसात नोंद झाल्या आहेत. नंतर मुख्यमंत्री डॉ. प्रमोद सावंत यांनी जमिन घोटाळ्याचे तपासकार्य पणजी येथील विशेष तपास यंत्रणेकडे सुपूर्द केले होते.