म्हापसा: स्टारको जंक्शन, हणजूण येथे एका सुपर मार्केटमध्ये चोरी केल्याप्रकरणी पोलिसांनी संशयित आरोपीला भारत-नेपाळ सीमेवर पलायनच्या तयारीत असताना त्याला अटक केली. पृथ्वी ऊर्फ आशिष मिजार (२८, नेपाळ) असे अटक केलेल्या संशयिताचे नाव आहे.

सदर चोरीची घटना ही १७ जुलै रोजी, मध्यरात्री घडली होती. याप्रकरणी सुपर मार्केटचे मालक इयान डिसोझा यांनी फिर्याद दिली होती. या तक्रारीनुसार, फिर्यादीच्या सुपर मार्केटमध्ये २५-३५ वयोगटातील दोघांनी मार्केटच्या पाठीमागील बाजूच्या खिडकीची ग्रिल कापून आतमध्ये प्रवेश केला.

संशयितांनी आपला चेहरा ओळखता येऊ नये म्हणून मास्क परिधान केले होते. या संशयितांनी मार्केटमध्ये विविध जागी ठेवलेली रोख तब्बल १.९० लाख रुपये लंपास केले. संशयितांनी मध्यरात्रीच्या वेळी ही चोरी अमलात आणली.

तपासाअंती पोलिसांनी संशयिताचा शोध घेत, पृथ्वी याला भारत-नेपाळ सीमेवर ताब्यात घेतले. त्याला सोमवारी हणजूण पोलिस स्थानकावर आणण्यात आले. त्याला सहा दिवसांची पोलीस कोठडी सुनावली आहे.