Ancient coins In Goa: नानोडा बांबर येथे विष्णू जोशी यांच्या खासगी जागेत सापडलेल्या पुरातन मध्ययुगीन नाण्यांची प्रत्यक्ष पाहणी करण्यासाठी पुरातत्व मंत्री सुभाष फळदेसाईंनी खात्याचे संचालक आणि इतर वरिष्ठ अधिकाऱ्यांसह सत्तरीतील नानोडा बांबर येथे बुधवारी प्रत्यक्ष भेट दिली. यावेळी विष्णू जोशी यांनी ती नाणी पुरातत्व खात्याकडे सुपूर्द केली.

ही नाणी गोव्याच्या वैभवशाली इतिहासाचे प्रतीक आहे. ही नाणी आम्ही फक्त प्रदर्शनापुरतीच मर्यादित न ठेवता त्यांचा शास्त्रशुद्ध अभ्यास केला जाईल,असे मंत्री सुभाष फळदेसाई यांनी सांगितले.

ही नाणी यंत्राद्वारे नव्हे, तर ती हाताने बनविण्यात आलेली आहेत. या नाण्यांचा अभ्यास करून ती कोणत्या काळातील आहेत, वापर कोणकोणत्या देशांत व्हायचा, कोणत्या राजाचे हे चलन होते, याचा अभ्यास करून सरकारला अहवाल सादर करण्यात येईल, असे मंत्री फळदेसाई यांनी दिली.

विष्णू जोशींचा होणार खास गौरव

नानोडा बांबर येथील ज्यांच्या जागेत ही नाणी सापडली आणि ज्यांनी अतिशय प्रामाणिकपणे ती सरकारच्या पुरातत्व खात्याकडे सुपुर्द केली. त्या विष्णू जोशींचा खास गौरव करण्याबाबत मुख्यमंत्र्यांकडे शिफारस करणार असल्याचे मंत्री फळदेसाईंनी सांगितले. ही नाणी जरी तांब्याची असली तरी ती 500 वर्षांपूर्वीची आहेत.

त्यांना खूप मागणी आहे आणि मोठी रक्कम देऊन ती कोणी विकतही घेतली असती. मात्र, असे न करता प्रामाणिक हेतूने विष्णू जोशी यांनी ती पुरातत्व खात्याकडे सुपुर्द केली. त्यांची ही कृती महान असल्याचे मंत्री फळदेसाई यांनी सांगितले.