Bicholim Project :

डिचोली, गेल्या जवळपास तीन वर्षांपासून प्रतीक्षेत असलेला राज्य महामार्ग-१ अंतर्गत येणारा डिचोली शहरातील चारपदरी बगलमार्ग अखेर पूर्ण झाला आहे. येत्या गुरुवारी (ता.६ जून) या महत्वाकांक्षी प्रकल्पाचे लोकार्पण करण्यात येणार आहे.

हा चारपदरी बगलमार्ग लोकार्पणासाठी सज्ज आहे,अशी माहिती आमदार डॉ. चंद्रकांत शेट्ये यांनी दिली आहे.

गुरुवारी सकाळी १०.३० वा. आयोजित खास सोहळ्यात मुख्यमंत्री डॉ.प्रमोद सावंत यांच्या हस्ते या बगलमार्गाचे लोकार्पण करण्यात येणार आहे. यावेळी आमदार डॉ. चंद्रकांत शेट्ये आणि प्रेमेंद्र शेट यांच्यासह राज्याचे मुख्य सचिव पुनीतकुमार गोयल, पीडब्ल्यूडीचे प्रधान मुख्य अभियंता आत्माराम गावडे आणि नगराध्यक्ष कुंदन फळारी उपस्थित राहणार आहेत. ४.२ किमी. अंतराचा हा चारपदरी बगलमार्ग आहे. या बगलमार्ग प्रकल्पावर ७५ कोटी हून अधिकचा खर्च करण्यात आला आहे.

व्हाळशी ते वाठादेवपर्यंतचा हा बगलमार्ग शहरातील एक महत्वाकांक्षी प्रकल्प आहे. तीन वर्षांपूर्वी या प्रकल्पाच्या कामाला सुरवात झाली होती. या बगलमार्गासाठी रोलिंगमिल-वाठादेव परिसरातील काही घरांवरही बुलडोझर फिरविण्यात आला आहे. या बगलमार्गावर दोन लहान मिळून तीन पूल तर दोन ओव्हरब्रीज येत आहेत.

या पुलांचे कामही पूर्ण झाले आहे. व्हाळशी आणि वाठादेव येथे मुख्य रस्त्याला जोडून असलेल्या जंक्शनवर विभाजक बसवून सर्कलही करण्यात आली आहेत. या चारपदरी बगलमार्गावरुन वाहतूक सुरु झाल्यानंतर शहरातील वाहतुकीवरील ताण कमी होताना अपघात आदी वाहतूक समस्येवर नियंत्रण येण्यास मदत होणार आहे. शहराबाहेर जाणाऱ्या अवजड वाहनांना हा बगलमार्ग किफायतशिर ठरणार आहे.

धोकादायक दरडीचा बंदोबस्त करा

शहरातील चारपदरी बगलमार्ग पूर्ण झाला असला, तरी या बगलमार्गाच्या बाजूने दोन ते तीन ठिकाणी धोकादायक आणि खचलेल्या अवस्थेत दरडी आहेत. या दरडी कोसळण्याचा धोका नाकारता येत नाही. पावसाळ्यात त्याचा अधिक धोका संभवत आहे.

धोका टाळण्यासाठी या दरडीचा बंदोबस्त करावा. सभोवताली जाळी मारावी. अशी मागणी पुढे येऊ लागली आहे. बगलमार्गाच्या लोकार्पणापूर्वी की नंतर ही उपाययोजना करण्यात येते, ते पहावे लागणार.