देशात पाच राज्यांच्या विधानसभा निवडणुका होत आहेत. यात गोवा राज्याचाही समावेश आहे. सत्तेमध्ये परतण्यासाठी भाजप गोव्यात आपली पूर्ण ताकद लावत आहे. तर दुसरीकडे राज्यात विधानसभा निवडणुकीसाठी कॉंग्रेसह तृणमुल कॉंग्रेस पक्षाने (Trinamool Congress) स्थानिक पक्षांबरोबर युती करण्यास सुरुवात केली आहे. मागील काही दिवसांपूर्वीच कॉंग्रेसने गोवा फॉरवर्ड पक्षाबरोबर (goa forward party) युती करत आपली ताकद वाढविण्यासाठी तयारी सुरु केली. मात्र कॉंग्रेसमधील विद्यमान आमदार तृणमुल कॉंग्रेससह भाजपमध्ये सामील होऊ लागले आहेत. यातच कॉंग्रेसचे विद्यमान आमदार अलेक्सो रेजिनाल्डो लॉरेन्को (Alexo Reginaldo Lorenko) यांनी तृणमुल पक्षामध्ये प्रवेश केला आहे. त्यामुळे कॉंग्रेसमध्ये पुन्हा फूट पडली आहे.

दरम्यान तृणमुल पक्षाच्या सर्वेसर्वा ममता बॅनर्जी (mamata banerjee) आणि राष्ट्रीय सरचिटणीस अभिषेक बॅनर्जी (abhishek banerjee) यांच्या उपस्थितीत आज तृणमूल कॉंग्रेसमध्ये सामील झाले आहेत. माजी कॉंग्रेस आमदार अलेक्सो रेजिनाल्डो लॉरेन्को यांचे स्वागत करताना आम्हाला आनंद होतो असे त्यांनी यावेळी म्हटले. अलेक्सो रेजिनाल्डो लॉरेन्को, ज्यांनी सोमवारी काँग्रेसचा राजीनामा दिला, ते गोव्यातील कुर्तोरिम येथील विद्यमान आमदार आहेत.

शिवाय, अलेक्सो रेजिनाल्डो लॉरेन्को यांनी तृणमुल पक्षात सामील झाल्यानंतर पक्षाच्या अध्यक्षा ममता बॅनर्जी आणि राष्ट्रीय सरचिटणीस अभिषेक बॅनर्जी यांची भेट घेतली. यावेळी त्यांच्याबरोबर म.गो. पक्षाचे प्रमुख सुधिन ढवळीकरही (Sudin Dhavalikar) उपस्थित होते.