खांडोळा: सांतईस्तेव्ह पंचायत क्षेत्रातील आखाडा बेटावर गणेश चतुर्थीपासून अनियमित व कमी दाबाने पाणीपुरवठा होत असल्याने नागरिकांना मोठ्या त्रासाला सामोरे जावे लागत आहे. ऐन चतुर्थीच्या काळात विशेषतः महिलांची पाण्यासाठी धावपळ झाली. सण संपल्यानंतरही परिस्थितीत सुधारणा झालेली नसल्याने नागरिकांत तीव्र नाराजी व्यक्त होत आहे.

आखाडा बेटावर चार विहिरी असून, सध्या त्यातील पाणी पिण्यायोग्य नसल्याने नागरिकांना पूर्णपणे नळाच्या पाणीपुरवठ्यावर अवलंबून राहावे लागत आहे. पूर्वी पिंपळाजवळील, श्री विठ्ठल रखुमाई मंदिराजवळील तसेच हनुमंत सावंत यांच्या घराजवळील विहिरींचे पाणी घरगुती वापरासाठी घेतले जात होते. मात्र, नळाद्वारे पाणीपुरवठा सुरू झाल्यानंतर विहिरींकडे दुर्लक्ष झाले. परिणामी त्यांची देखभाल न झाल्याने पाणी वापरण्यायोग्य राहिलेले नाही.

चतुर्थीपूर्वीच नळाला अनियमित पाणी येण्यास सुरुवात झाली होती. बेटावरील अनेक घरे उंचावर असल्याने उच्च दाबाने पाणीपुरवठा झाल्यासच तेथे पाणी पोहोचते. कमी दाब असल्यास नागरिकांना रात्रभर जागून थोडे-थोडे पाणी साठवावे लागते. उत्तर चतुर्थीच्या काळात ही समस्या अधिक गंभीर झाली.

पाणी खात्याच्या कर्मचाऱ्यांकडे विचारणा केली असता, उच्च दाबाने पाणीपुरवठा केल्यास जलवाहिनी फुटण्याची शक्यता असल्याचे सांगण्यात आले. त्यामुळे ऐन सणासुदीत नागरिकांना त्रास सहन करत चतुर्थी साजरी करावी लागली.

पाणीटंचाईमुळे नागरिकांच्या दैनंदिन कामकाजावरही परिणाम होत असून, स्वयंपाक, साफसफाई तसेच इतर घरगुती कामांसाठी पाणी साठवून ठेवण्याची वेळ त्यांच्यावर आली आहे. विशेषतः ज्येष्ठ नागरिक आणि महिलांना पाणी भरण्यासाठी अधिक त्रास सहन करावा लागत आहे. त्यामुळे संबंधित यंत्रणांनी केवळ तात्पुरती नव्हे, तर कायमस्वरूपी उपाययोजना करून आखाडा बेटावरील पाणीपुरवठ्याचा प्रश्न सोडवावा, अशी मागणी नागरिकांकडून होत आहे.

विहिरी स्वच्छ करा!

पाणी खात्याच्या वरिष्ठ अधिकाऱ्यांनी या समस्येची तातडीने दखल घेऊन पाणीपुरवठा सुरळीत करावा. तसेच पंचायतीने विहिरींची स्वच्छता करून किमान वापरण्यायोग्य पाणी उपलब्ध करून द्यावे, अशी मागणी स्थानिकांनी केली आहे.