Illegal businesses sealed in Agonda

आगोंद: आगोंद किनाऱ्यावरील कासव संवर्धन भागात बेकायदा थाटण्‍यात आलेल्‍या २० पैकी एकूण १७ आस्थापनांना आज टाळे ठोकण्‍यात आले. ३ आस्‍थापनांनी प्रदूषण नियंत्रण मंडळाला आवश्यक परवाने सादर केल्‍याचे समजते.

‘कन्सेट टू ओपरेट’ परवाना नसलेल्या आस्थापनांवर मुंबई उच्च न्यायालयाच्या गोवा खंडपीठाने कारवाईचे आदेश दिले होते. त्‍यानुसार आज काणकोण उपजिल्हाधिकारी व मामलेदार यांच्या नेतृत्वाखालील पथकाने १७ आस्थापनांना टाळे ठोकले. त्‍यांची वीजजोडणी तोडण्‍यात आली. यावेळी चोख पोलिस बंदोबस्त ठेवण्यात आला होता.

२० आस्थापनांना बजावल्या होत्‍या नोटिसा

गोवा प्रदूषण नियंत्रण मंडळातर्फे आगोंद येथील रिसॉर्टसह २४ पैकी २० आस्थापनांना व्यवसाय बंद करण्याच्या नोटिसा बजावल्या होत्या. त्यांपैकी ८ बांधकामांना टाळे ठोकण्यात आले तर ९ बांधकामे मालकांनी स्वतःहून हटविली. ३ आस्‍थापनांनी प्रदूषण नियंत्रण मंडळाला आवश्यक परवाने दिले.