Calangute Extortion Case: कळंगुट-बागा परिसरातील हॉटेल, रेस्टॉरंट्समधून खंडणी मागितल्याचे प्रकरण गेल्या काही दिवासांमध्ये चर्चेत आले होते. कळंगुटचे आमदार मायकल लोबो यांनीच याची वाच्यता केली होती.

पण नंतर काही दिवसांनी त्यांनीच हे प्रकरण आता मिटले आहे, असे म्हणून या प्रकरणाला पुर्ण विराम लावण्याचा प्रयत्न केला होता. आता पोलिसांनीही खंडणी प्रकरणाबाबत एकही तक्रार नोंद नसल्याचे सांगत हे प्रकरण क्लोज झाल्याचे म्हटले आहे.

उत्तर गोव्याचे पोलीस अधीक्षक निधीन वाल्सन म्हणाले की, काही दिवसांपुर्वी सोशल मीडियात एक निवेदन व्हायरल झाले होते. त्यात सात जणांच्या सह्या होत्या. त्यात खंडणीची तक्रार केली होती. त्याची पडताळणी केली असता व्हिएतनाममधील नंबरवरून ती तक्रार आल्याचे स्पष्ट झाले होते.

त्यातील काही सह्यांशी साधर्म्य असल्याने दोघांनी पोलिसांशी संपर्क साधला होता. त्यांनी त्यांचे नाव आणि सही वापरल्याचे म्हटले होते. पण त्यांनी या पत्राशी त्यांचा संबंध नसल्याचे स्पष्ट केले.

त्यानंतर पोलिसांनी खंडणीबाबत काही तक्रार असल्यास दाखल करावी, असे आवाहन केले होते. जेणेकरून त्याबाबत चौकशी करता येईल. पण आत्तापर्यंत कुणीही खंडणीची तक्रार दाखल केलेली नाही.

खंडणीचा मुद्दा आमदार मायकल लोबो यांनी उपस्थित केला होता. मायकल लोबो यांच्याच हॉटेलमध्ये काही जणांनी खंडणी मागितली होती, त्यामुळे लोबोंनी हा विषय उपस्थित केला होता. तथापि, काही दिवसांनी लोबो यांनी स्वतःच हे प्रकरण मिटल्याचे म्हटले होते.

वाल्सन म्हणाले की, आमदार लोबो यांनीही तक्रार दिलेली नाही. क्राईम ब्रँचनेही या प्रकरणाची चौकशी करण्याचा प्रयत्न केला, पण त्यातून काहीही निष्पन्न झालेले नाही. त्यामुळे आमच्यासाठी हे प्रकरण बंद झाले आहे. आत्तापर्यंत याबाबत कुणीही तक्रार दिलेली नाही.

तथापि, जर कुणाला काही तक्रार असेल तर त्यांनी यावे. स्पेशल ब्रँच, क्राईम ब्रँच आहे. आम्ही योग्य ती कारवाई करू.

कळंगुटमधील वेश्याव्यवसायाच्या आरोपांबाबत जेव्हा आम्हाला तक्रार मिळेल किंवा माहिती मिळेल आम्ही तत्काळ गुन्हा नोंदवू. नुकताच दक्षिण गोव्यात अशी एक ह्युमन ट्रॅफिकिंगची केस पोलिसांनी नोंद केली होती, असेही वाल्सन म्हणाले.