पणजी: सांताक्रूझ मतदारसंघातून काँग्रेसमधून निवडून आलेल्यांनी इतर पक्षात उड्या मारल्या आहेत. निवडून येण्यापूर्वी त्यांनी सर्व देवधर्मांच्या शपथा घेतल्या, त्यांनी देवतांचा अपमान केला नाही तर त्या-त्या मतदारांचा विश्वासाला तडा दिला आहे. यामागे सूत्रधार भाजप होता, काँग्रेस पक्षात प्रवेश करीत असून, आपल्याकडून सांताक्रूझमधील जनतेचा कधीच विश्वासघात होणार नाही, अशी ग्वाही ॲड. अमित पालेकर यांनी पक्ष प्रवेशावेळी दिली.

मेरशी येथील शुक्रवारी सायंकाळी झालेल्या पक्षप्रवेशावेळी ॲड. पालेकर यांनी काँग्रेसचा पक्षसदस्यत्वचा अर्ज प्रदेशाध्यक्ष अमित पाटकर यांच्याकडे सुपूर्द केला.

यावेळी व्यासपीठावर गोवा प्रभारी माणिकराव ठाकरे, प्रभारी सचिव डॉ. अंजली निंबाळकर, विरोधी पक्षनेते युरी आलेमाव, आमदार एल्टन डिकॉस्ता, ॲड. कार्लोस फेरेरा, माजी खासदार फ्रान्सिस सार्दिन, उपाध्यक्ष एम. के. शेख, सुनील कवठणकर, महिला प्रदेश काँग्रेसच्या अध्यक्षा प्रतीक्षा खलप, प्रदेश युवक काँग्रेसचे अध्यक्ष अर्चित नाईक यांच्यासह विविध सेलचे अध्यक्ष, विविध विभागातील गटाध्यक्ष यांची उपस्थिती होती.

ॲड. पालेकर यांनी आपली कौटुंबिक वाटचाल ही सर्वधर्म समभाव या विचाराने होत असल्याचे उदाहरण दिले. ठाकरे यांनी काँग्रेसची वाटचाल ज्याप्रमाणे सुरू आहे, ती पाहता २०२९ मध्ये केंद्रात निश्चित बदल होईल, असा विश्वास व्यक्त केला. त्यांनी पालेकर आपण नेते आहात, त्यामुळे तुम्ही एकत्र बसून एकमेकांना साथ द्या, असा ठाकरे यांनी सल्ला दिला.