IFFI Goa 2023: बॉलिवूडमधील एक आघाडीची अभिनेत्री उर्वशी रौतेला स्टारर ‘ऐ दिल है ग्रे’ गोवा आंतरराष्ट्रीय चित्रपट महोत्सवात आंतरराष्ट्रीय स्तरावर आपली छाप पाडण्यासाठी सज्ज झाला आहे. उर्वशीच्या या चित्रपटाचा नुकताच टोरंटो आंतरराष्ट्रीय चित्रपट महोत्सव 2023 मध्ये प्रीमियर झाला होता. या चित्रपटाचे अनेकांनी कौतुक केले असून, उर्वशीच्या अभिनयाची प्रशंसा केली आहे.

धनत्रयोदशीच्या शुभ दिवशी, उर्वशीने तिच्या सोशल मीडिया अकाऊंटवरुन ही बातमी शेअर केलीय. 27 नोव्हेंबर रोजी गोवा आंतरराष्ट्रीय चित्रपट महोत्सव 2023 मध्ये तिचा हा चित्रपट प्रीमियर होणार आहे, जिथे ती गाला महोत्सवात देखील सहभागी होणार आहे, अशी उर्वशीने माहिती दिली.

"दिल है ग्रे या माझ्या चित्रपटाच्या वर्ल्ड प्रीमियरची घोषणा करताना मी खूप आनंद होत आहे. हा चित्रपट माझ्या हृदयाच्या खूप जवळ आहे. आंतरराष्ट्रीय महोत्सवांमध्ये याला मिळालेले प्रेम याबद्दल मी खूप कृतज्ञ आहे. 27 नोव्हेंबर रोजी गोव्यातील गाला महोत्सवात भेटूया," असे उर्वशी म्हणाली.

‘ऐ दिल है ग्रे’ हा एक रोमँटिक थ्रिलर चित्रपट आहे. चित्रपट प्रेक्षकांना भावनिक रोलरकोस्टर राईडची हमी देतो. सुसी गणेशन यांनी या चित्रपटाचे दिग्दर्शन केले आहे. चित्रपटात अभिनेत्री उर्वशी रौतेला, विनीत कुमार सिंग आणि अक्षय ओबेरॉय यांनी अभिनय केला आहे.