पणजी: आज पहाटे साडेपाचच्या सुमारास बांबोळी येथील मनोरुग्ण इस्पितळाच्या (IPHB) शौचालय खिडकीतून आरोपी शहाबुद्दिन शेख (23) याने पलायन केले. याप्रकरणी आगशी पोलिस स्थानकात गुन्हा दाखल करण्यात आला असून त्याचा शोध घेतला जात असल्याची माहिती दिली. विविध भागातील वाहन चोरीप्रकरणी त्याच्यावर गुन्हे दाखल आहेत.

आगशी पोलिसांनी दिलेल्या माहितीनुसार आरोपी शहाबुद्दिन शेख हा कोलवाळ येथील तुरुंगात होता. काही दिवसांपूर्वी त्याला मनोरुग्‍ण इस्पितळात उपचारासाठी दाखल करण्यात आले होते. आज पहाटेच्या सुमारास तो इस्पितळातील शौचालयात गेला. खूप वेळ झाला तरी शौचालयाचे दार बंद असल्याने इस्पितळातील कर्मचाऱ्यांना संशय आला. त्यांनी दार ठोठावले असता आतून आवाज येत नव्हता. त्यामुळे या शौचालयाच्या मागील बाजूने जाऊन पाहिले असता आतमध्ये कोणीही नव्हते. या खिडकीतून शहाबुद्दिन शेख याने पलायन केल्याचे लक्षात येताच त्याची माहिती पोलिसांनी देण्यात आली.

आरोपी शहाबुद्दिन शेख हा वास्को येथील असून त्याला अनेक वाहन चोरीप्रकरणात अटक झाली आहे. काही प्रकरणात त्याने चोरीची कबुली दिल्याने न्यायालयाने शिक्षा ठोठावली आहे तर काही प्रकरणांवरील खटले न्यायालयात प्रलंबित आहेत. काही दिवसांपासून मानसिक संतुलन बिघडल्याने त्याला उपचारासाठी दाखल केले होते. या मनोरुग्ण इस्पितळात सुरक्षारक्षक आहेत मात्र आवारातच सुरक्षा नसल्याचा फायदा उठवून तो पसार झाला.