Velus Accident: वेळूस येथे वाळपई ठाणे मार्गावर समोरून येणाऱ्या वाहनांचा अंदाज येत नसल्याने वारंवार अपघात होत आहेत. त्यामुळे या अपघाताला आळा बसण्यासाठी हा रस्ता रुंद करण्याची मागणी येथील स्थानिक करत आहेत.

यावेळी मिळालेल्या माहितीनुसार, वेळूसरस्ता हा मुख्य असून या मार्गावर लोकांची व वाहतुकीची मोठ्या प्रमाणात वर्दळ असते. सदर मार्गावर असलेल्या वळणावर पुढील येणाऱ्या वाहनांचा अंदाज येत आहे. तसेच वाहन चालवताना जीव मुठीत धरुन वाहन चालवावे लागत आहे.

यामार्गावर अनेक वेळा पुढील वाहनांचा अंदाज येत नसल्याने वारंवार अपघाताला सामोरे जावे लागत आहे. काही वर्षांपूर्वी या मार्गावर बस व मोटरसायकल यामध्ये अपघात होऊन तरुणांचा जीव गेला होता.

तर काही दिवसांपूर्वी मोटर सायकल व कारमध्ये अपघात होऊन एका युवकाला जबर दुखापत झाली होती. त्यामुळे या वळणावरची रुंदी वाढवण्याची आवश्यकता आहे. तरच याठिकाणी होणाऱ्या अपघाताला आळा बसेल, असे सांगण्यात येत आहे.

यावेळी आपली प्रतिक्रिया व्यक्त करताना स्थानिक नगरसेवक रामदास शिरोडकर म्हणाले, आपण यासंबंधीत रस्ता रुंद करण्यासंबंधी रस्त्याच्या बाजूला असलेल्या जमिनीच्या मालकाकडे रुंदीकरण करण्यासाबंधी विचारणा केली आहे. त्यामुळे लवकरच सर्व सोपस्कार पूर्ण करुन याचे काम सुरू केले जाईल, असे आश्वासन दिले आहे. त्यामुळे लवकरात लवकर हा रस्ता सुरळीत करावा, अशी मागणी जोर धरु लागली आहे.