पणजी : गोव्यात अटल सेतूवर अपघातांची मालिका सुरुच आहे.‌ काल रविवारी रात्री झालेल्या तीन वाहनांच्या विचित्र अपघातानंतर आज पुन्हा एकदा या सेतूवर अपघात झाला आहे. एका भरधाव कारची वीजेच्या खांबाला धडक‌ बसल्याने भीषण अपघात झाला. अपघातात कारच्या दर्शनी भागाचं मोठं नुकसान झालं.

अटल सेतूवर एक खड्डा पडल्याची माहिती असून हा खड्डा चुकवण्याच्या नादात वाहनांचे अपघात होऊ लागले आहेत. त्यातच अटल सेतूवर केवळ चारहून अधिक चाकं असणाऱ्या वाहनांनाच प्रवेश असल्यामुळे बहुतांश वाहनं ही वेगात असतात. त्यामुळे अनेकदा चालकाचं वाहनावरील नियंत्रण सुटून अपघात होत असल्याचं दिसून आलं आहे. गेल्या 24 तासांमध्ये एकाच जागी 4 गाड्यांचा अपघात झाल्यामुळे पुलावरील वाहतुकीवर मोठं प्रश्नचिन्ह निर्माण झालं आहे.

पणजी आणि पर्वरीला जोडणाऱ्या अटल सेतूवर रविवारी संध्याकाळी विचित्र अपघात झाला. यात दोन गोव्यातील वाहनं तर एक महाराष्ट्रातील वाहन अपघातग्रस्त झालं. रस्त्याच्या मधोमध खड्डा आल्याने कारचालकाने ब्रेक लावला. यामुळे कारच्या मागून येणाऱ्या दोन कारचालकांची समोरील कारला जोरदार धडक बसली. अपघातानंतर वाहतुकीची मोठी कोंडी पाहायला मिळाली. पोलिसांनी क्रेन आणून अपघातग्रस्त वाहनं बाजूला केल्यानंतर वाहतूक सुरळीत करण्यात आली.