पणजी: गुंतवणूक प्रोत्साहन मंडळाची (आयपीबी) बैठक होऊन दहापैकी चार प्रकल्‍पांच्‍या प्रस्तावांना मंजुरी देण्यात आली. त्यामध्ये लाटंबार्से व कुंडई येथील प्रकल्पांचा समावेश आहे. एक प्रकल्प खासगी आहे. या प्रकल्पांमध्‍ये सुमारे 230 कोटी रुपयांची गुंतवणूक केली जाणार आहे व त्याद्वारे 1489 जणांना रोजगार उपलब्ध होणार आहे. 82 टक्के रोजगार हा स्थानिकांना मिळेल, अशी माहिती मुख्यमंत्री डॉ. प्रमोद सावंत यांनी दिली.

दरम्‍यान, राज्यातील पर्यटन धोरण आणि पर्यटनाभिमुख प्रकल्पांच्या प्रचार आणि प्रसारासाठी स्थापन करण्यात आलेल्या गोवा पर्यटन महामंडळाची पहिली बैठकही मुख्यमंत्री डॉ. प्रमोद सावंत (Pramod Sawant) यांच्या अध्यक्षतेखाली पर्वरी सचिवालयात झाली. पर्यटन (Tourism) क्षेत्राची शाश्‍वत आणि जलद वाढ सुनिश्‍चित करण्यावर त्‍यात चर्चा झाली. यापुढे पर्यटनाबाबतचे निर्णय या मंडळामार्फत घेतले जाणार आहेत.

उपमुख्यमंत्री मनोहर आजगावकर (Manohar Ajgaonkar) यांनी सांगितले की, गोवा (Goa) पर्यटन मंडळ पर्यटन धोरणाची अंमलबजावणी आणि राज्यांत अनेक नवीन पर्यटन सेवा सुरू करण्यात ते महत्त्वपूर्ण भूमिका बजावेल. गोवा पर्यटनच्या गोवाच्या प्रभावी कामकाजासाठी सीईओच्या नियुक्तीवरही या बैठकीत चर्चा झाली.

मंडळामध्ये राज्य आणि केंद्र सरकारचे वरिष्ठ अधिकारी आणि पर्यटन व्यवसायाशी संलग्न संघटनांचे प्रतिनिधी यांचा समावेश आहे. या बैठकीला मुख्य सचिव परिमल राय, मुख्यमंत्र्यांचे सचिव अशोक कुमार, पर्यटन संचालक मेनिनो डिसूझा व निखिल देसाई आणि इतर उपस्थित होते.