‘आप’च्‍या नेत्या आतिषी यांनी गोव्यात काँग्रेसबरोबर आघाडी करणार नसल्‍याचे सांगितले असे ऐकिवात आले आहे. त्यांनी ती भूमिका कोणत्या मुद्यावर मांडली हे माहीत नाही. कारण ‘आप’चे प्रदेशाध्यक्ष काही आठवड्यांपूर्वी आघाडीची व एकत्रित लढण्याची भाषा बोलत होते. त्यामुळे आतिषी यांनी स्थानिक राजकीय स्थिती जाणून घेतली की नाही, हे माहीत नाही. निवडणुकीवेळी काँग्रेसने आघाडी काँग्रेसबाबतचा निर्णय केंद्रातील वरिष्ठ नेते घेतात. त्यामुळे आपण त्यावर काही अधिक बोलू शकत नाही.

काँग्रेस पक्षाचे नेते राहुल गांधी हेच स्वतः आपल्याच पक्षातील लोक भाजपसाठी काम करतात असे सांगत आहेत. त्यामुळे काँग्रेसवर किती विश्वास ठेवावा? २०२७ मध्ये विरोधकांनी एकत्रितपणे लढल्यास भाजपला पराभूत करता येईल, हे आपण बोललो असलो तरी काँग्रेसच्या नेत्यांनी केलेल्या वक्तव्यामुळे युती कोणाबरोबर करावी, हा प्रश्न उपस्थित होतो.

२०२२च्या विधानसभा निवडणुकीत गोमंतकीयांनी ‘आप’चे दोन आमदार निवडून दिले होते. हे आमदार कुठल्‍याही आमिषाला बळी पडलेले नाहीत आणि भाजपमध्‍येही गेले नाहीत. उलट काँग्रेसचे ११ आमदार जिंकून आले व त्‍यातील आठजण भाजपमध्‍ये गेले. त्‍यामुळे हा पक्ष विश्‍‍वास ठेवण्‍यासारखा नाही.