Panjim Smart City: स्मार्ट सिटी मिशनअंतर्गत पणजी शहरात वेगाने विकासकामे सुरू आहेत. शनिवारी सायंकाळी टोंक-करंझाळे येथे मैलावाहू टँकरचे ( जीए-०३-डब्ल्यू-१११३) मागील चाक चेंबरमध्ये अडकले आणि टँकर जागीच कलंडला. त्यामुळे मलनिस्सारणाच्या चेंबरच्या कामावर प्रश्‍न उपस्थित केले जात आहेत.

स्मार्ट सिटीअंतर्गत करंझाळे येथील मलनिस्सारण प्रक्रिया प्रकल्प ते इंटरनॅशनल हॉटेलपर्यंतचा (मिरामार) रस्ता रुंद केला आहे. त्याचे सुशोभीकरणाचे काम बाकी आहे. काही महिन्यांपूर्वीच हा रस्ता वाहतुकीसाठी खुला झाला होता.

सिमेंट रस्त्याच्या बाजूला पदपथाशेजारी वाहन पार्किंगच्या जागी पेव्हर्स टाकले आहेत. याच पेव्हर्सच्या खाली मलनिस्सारणाचे चेंबर आहेत. या पेव्हर्सवरून जाताना मैलावाहू टँकरचे मागील चाक रुतले. त्याचवेळी टँकरचा वेग वाढविल्याने चेंबरवरील पेव्हर्स बाजूला सरकून चाक खाली गेले आणि टँकर कलंडला. यात चालक वा क्लिनरला इजा झाली नाही. मात्र, स्मार्ट सिटीच्या कामाच्या दर्जाविषयी प्रश्‍न उपस्थित केला जात आहे.

शहरात यापूर्वी जी कामे सुरू आहेत, त्यामुळे पणजीकर त्रस्त आहेत. सांतिनेजमधील खोदकामाचा दररोज ताळगावमधून ये-जा करणाऱ्यांना त्रास सहन करावा लागत आहे. यंदा पावसाळ्यापूर्वी जी कामे झाली, त्यांच्या दर्जाविषयी संशय व्यक्त केला जात होता.

चेंबर खोदकाम सुरू झाल्यानंतर शहरात किमान सहा ते सात वेळा टँकर आणि अवजड वाहने कलंडण्याचे प्रकार घडले आहेत.

विरोधकांना कोलीत

स्मार्ट सिटीच्या कामाचा विषय यापूर्वी विधानसभेतही गाजला आहे. विरोधी पक्षनेते युरी आलेमाव आणि गोवा फॉरवर्डचे आमदार विजय सरदेसाई यांनी या कामाविषयी सतत आवाज उठवला होता. आता रस्त्याचे काम होऊनही जर अवजड वाहनांमुळे चेंबर खचत असेल तर कामाच्या दर्जाचा प्रश्‍न उपस्थित होणारच आहे. उत्पल पर्रीकर यांनीही शहरात पाहणी करून पुन्हा एकदा खोदकामावर प्रश्‍न उपस्थित केले आहेत.