पेडणे: गोव्यातील (Goa) सक्राळ-तोरसे येथील चंद्रकांत बांदेकर या 55 वर्षीय नागरिकाचा मृतदेह भोम मैदानाजवळ असलेल्या कच्‍च्या रस्त्यावर आज संध्याकाळी सापडल्याने या परिसरात खळबळ उडाली. बांदेकर यांच्या अंगावर, छातीवर धारदार हत्यारांनी वार करण्‍यात आले आहेत. मृतदेह दृष्टीस पडल्यानंतर पेडणे पोलिसांना कळविण्यात आले. (A man was killed near Bhoma ground in Goa)

पेडणेचे पोलिस निरीक्षक जीवबा दळवी यांच्या मार्गदर्शनाखाली पंचनामा करण्यात आला. ज्या ठिकाणी मृतदेह सापडला त्या ठिकाणी बांदेकर यांची जीए-11-एफ-7142 क्रमांकाची स्कूटर सापडली आहे. चंद्रकांत यांनी हेल्मेट परिधान केले होते, तर त्यांची दुचाकी मृतदेहाशेजारी उभी होती.

चंद्रकांत बांदेकर हे सक्राळ-तोरसे येथे रेती व्यवसाय करत होते. पोलिसांनी मृतदेह बांबोळी येथील गोवा वैद्यकीय महाविद्यालयाच्या इस्पितळात पाठविला आहे. खून झाला त्‍या ठिकाणी दुपारी आतील रस्त्याच्या बाजूला दहा-पंधराजण असल्याची चर्चा असून, अनेकांनी त्यांना पाहिले आहे.