Margao Fire News: मडगाव येथील न्यू मार्केट परिसरात गजबजलेल्‍या ठिकाणी एका कपड्यांच्या दुकानाला तसेच फार्मसीला मंगळवारी सकाळी 11.35 च्या सुमारास आग लागल्‍याने व्यापाऱ्यांची तारांबळ उडाली. ही आग इतरत्र पसरल्‍याने लगतच्‍या चार दुकानांना झळ बसली. आगीत कोणत्या दुकानाची किती प्रमाणात हानी झाली, याविषयी अहवाल प्राप्त होऊ शकला नाही.

अग्निशमन दलाला तातडीने बोलाविण्‍यात आले. मात्र, अरुंद रस्‍ते आणि रस्‍त्‍यावर अस्ताव्यस्त उभी केलेली वाहने यांमुळे आगीचे बंब घटनास्‍थळापर्यंत पोचण्‍यासाठी वेळ लागला, असे या भागातील दुकानदारांनी सांगितले. ही आग दुकानातील ‘एसी’मधील बिघाडामुळे घडली असावी, असा प्राथमिक अंदाज अग्निशमन दलाच्या पथकाने व्यक्त केला आहे.

हे दुकान चाळवजा जागेत आहे. याठिकाणी पाहणी केल्यानंतर आमदार दिगंबर कामत म्हणाले की, मार्केटमधील दुकानांची रेलचेल आटोक्याबाहेर गेली आहे. या प्रकरणी नगरपालिका, जिल्हाधिकारी, पोलिस प्रशासन, आरटीओ व संबंधित अधिकाऱ्यांची तातडीने बैठक बोलाविण्याची मागणी केली आहे. याप्रश्नी तोडगा काढणे आवश्यक असल्याचे ते म्हणाले.

या ठिकाणी आग विझविण्यासाठी आलेल्या अग्निशमन दलाच्या प्रमुखाने सांगितले की, वाहतुकीची कोंडी होत असल्याच्या कारणाने या ठिकाणी यायला उशीर झाला. हा प्रश्न व्‍यापारी संघटनेचे अध्‍यक्ष विनोद शिरोडकर यांनी उपस्थित केला होता आणि अग्निशमन दलाच्या गाडीने एक तास उशीर लागला, असा आरोपही केला. मात्र, या दुर्घटनेत किती दुकानांचे नुकसान झाले, याविषयी माहिती प्राप्त झालेली नाही.

यंत्रणेचा अभाव

न्यू मार्केट असोसिएशनचे अध्‍यक्ष विनोद शिरोडकर म्हणाले की, या मार्केटमधील दाटीवाटीने उभारलेली दुकाने आणि येथे येणाऱ्या ग्राहकांची लक्षात घेता येथे अद्ययावत अग्निशमन यंत्रणा बसविण्याची आमची ३५ वर्षांपासूनची मागणी होती, त्याची अद्याप पूर्तता झालेली नाही. त्यामुळे येथे वारंवार अशा दुर्घटना घडल्या आहेत.