Siolim fire शिवोली बामन वाडो येथील एका मोठ्या वाळलेल्या आंब्याच्या झाडाला आग लागल्याची घटना घडली. ही आग दुपारी 3 च्या सुमारास लागल्याची माहिती अग्निशामक दलाकडून प्राप्त झाली.

प्रत्यक्षदर्शींच्या म्हणण्यानुसार, एका खाजगी मालमत्तेची साफसफाई करताना आग लावण्यात आली असावी. मात्र तीव्र ऊन आणि वारा यामुळे ही आग वाढत गेली आणि या कंपाउंडच्या भिंतीलगत असलेल्या वाळलेल्या आंब्याच्या झाडाला लागली.

आगीची तीव्रता एवढी होती की, या झाडाने पूर्णतः पेट घेतला. घटनेचे गाम्भीर्य लक्षात घेऊन स्थानिकांनी आग विझविण्याचा प्रयत्न केला मात्र आगीची तीव्रता अधिक असल्याने म्हापसा अग्निशामक दलाला पाचारण करण्यात आले.

सदर घटनास्थळी जाण्याचा रस्ता अरुंद असल्याने बंब पोहोचण्यास अडचण येत होती मात्र अखेर अग्निशामक दलाच्या कर्मचाऱ्यांनी अथक प्रयत्नांनी आगीवर नियंत्रण मिळवले.

या घटनास्थळा लगतच लोकवस्ती असून आग लागलेले झाड जर कोसळले असते तर मोठी दुर्घटना घडली असती.

मात्र अग्निशामक दलाच्या कार्यतत्परतेमुळे दुर्घटना टळली. या घटनेत कोणतीही जीवित हानी झाली नसल्याची माहिती अग्निशामक दलाकडून देण्यात आली आहे.