गोव्यातील रस्ते अपघातांचे वाढते प्रमाण हे चिंतेचे कारण बनले आहे. दर एक दिवसाआड अपघाताच्या घटना घडत आहेत. वाहतूक पोलीस विभागातर्फे योग्य ती खबरदारी आणि जनजागृती करूनही या घटनांमध्ये काहीच कमी आल्याचे दिसून येत नाही.

वेर्णा येथे कामाला असणाऱ्या रामनगरमधील (कर्नाटक) सूरज म्हाळकर या 22 वर्षीया तरुणाचा दुचाकी अपघातात मृत्यू झाला आहे. हा अपघात कुंभारवाडा येथे झाल्याची माहिती समोर आली आहे.

काल (मंगळवारी) रात्री वेर्णा येथून कामावरून परतत असताना सूरज याच्या दुचाकीची खांबाला जोरदार धडक बसली. यामध्ये त्याचा मृत्यू झाला तर त्याच्यासोबत असलेला स्वप्नील सोलेकर (23 वर्षे) जखमी असून त्याच्यावर गोमेकॉमध्ये उपचार सुरु आहेत.

दरम्यान, पर्वरीच्या दिशेने जाणाऱ्या कदंब बसवरील चालकाचे नियंत्रण गेल्याने बसने पर्वरी येथील मॉल दी गोवा जवळ रस्त्याच्या बाजूला उभ्या असलेल्या कारला आदळून पुढे जाऊन झाडाला धडक दिली. हा अपघात काल सकाळी 10.25 च्या सुमारास घडला. अपघातात वाहक व चालक गंभीर जखमी झाले असून त्यांना गोमेकॉ इस्पितळात उपचारासाठी दाखल करण्यात आले असल्याची माहिती पर्वरी पोलिसांनी दिली.