राज्यात गेल्या काही दिवसांपासून सातत्याने पडत असणाऱ्या पावसामुळे अनेक ठिकाणी जीवीतहानीसह मोठी वित्तहानी झाली आहे. राजधानी पणजीतही अनेक ठिकाणाहून पावसामुळे पडझडीच्या घटना समोर आल्या आहे. यातच आज, (रविवारी) नेहमीप्रमाणे कामासाठी निघालेल्या आरतीचा काळाने घात केला.

आज सकाळी 10-10.30 च्या दरम्यान जोरदार वाऱ्यामुळे राजधानीतील मेरी इमॅक्युलेट चर्च जवळील पालिका गार्डनसमोरील रस्त्याशेजारील झाड पडले. यावेळी कामासाठी जात असलेली 19 वर्षीय युवती आरती गोंड झाडाखाली सापडली. त्यात ती गंभीर जखमी झाली. अग्निशामक दलाच्या जवानांनी ताबडतोब तिला बाहेर काढत 108 रुग्णवाहिकेमधून गोमेकॉत दाखल केले. तिच्यावर सकाळपासून उपचार चालू होते. मिळालेल्या माहितीनुसार, आता उपचारादरम्यान तिचा मृत्यू झाला. मयत युवती आरती गोंड (वय 19) रामनगर बेती येथील रहिवासी आहे.

बाबुश मोन्सेरात यांचे निर्देश

झाड पडून युवतीच्या मृत्यूची घटना दुर्दैवी. मी लोकांना विनंती करतो की त्यांनी जीर्ण झाडांबाबतीत खबरदारी बाळगावी व अशा झाडांखाली वाहने लावू नयेत. वन खात्याकडून राजधानी पणजीतील धोकादायक झाडांबाबत अहवाल मागवून घेण्यासंबंधी मी पणजी महापालिकेच्या आयुक्तांना निर्देश दिले आहेत, असे पणजीचे आमदार मंत्री बाबुश मोन्सेरात यांनी सांगितले.