Goa Dairy: गोवा डेअरीच्या 9 संचालकांना अपात्र ठरविण्यात आले आहे. सहकार निबंधकांनी ही कारवाई केली आहे. 6 कोटी रूपयांच्या गैरव्यवहाराप्रकरणी चौकशी सुरू होती. त्यानंतर ही कारवाई झाली आहे.

दरम्यान, गोवा डेअरीला तत्कालीन संचालक मंडळ आणि व्यवस्थापकीय संचालकांच्या सदोष निर्णयामुळे सहा कोटी रुपयांचे नुकसान झाल्याचा आरोप करण्यात आला होता. त्यानतंर सहकार निबंधकाकडून 18 संचालकांना कारणे दाखवा नोटीस बजावण्यात आली होती.

उच्च न्यायालयाच्या आदेशानंतर सहकारी संस्थांच्या निबंधकांनी 17 फेब्रुवारी रोजी कथित गोवा डेअरी घोटाळा प्रकरणी सहकारी संस्था निबंधक, पाटो-पणजी येथील कार्यालयात सुनावणी झाली होती.

गोवा डेअरी कथित घोटाळ्याची चौकशी करण्यास सहकारी संस्थांचे निबंधक दिरंगाई करत आहेत, असा आरोप तक्रारदारांनी करत उच्च न्यायालयात धाव घेतली होती. उच्च न्यायालयाने सहकारी संस्थांच्या निबंधकांना तीन महिन्यांत चौकशी पूर्ण करण्याचे निर्देश दिले होते.

पशुखाद्य निर्मिती केंद्रात दर्जाहीन साहित्य वापरण्यात आल्याचे, म्हशीचे दूध शेजारील राज्यातून अधिक दराने खरेदी करण्यात आल्याचे तसेच आईस्क्रीम प्लांटसाठी कमी दर्जाचे मशिन खरेदी करण्यात आल्याचे आरोप झाले होते.

सहाय्यक निबंधकांनी केलेल्या चौकशी अहवालातूनही ते समोर आले होते. याचा फटका गोवा डेअरीला बसला असून यात एक कोटी रुपयांचे नुकसान झाले आहे.