Cashew Feni Goa काणकोण तालुक्यात गुळे ते पोळे व खोला ते खोतीगावपर्यंत काजू फेणी गाळपचे 89 विभाग आहेत. या 89 विभागासाठी दरवर्षी अबकारी खाते पावणी काढत असते.

यंदा सात विभागांसाठी पहिल्या फेरीतील पावणी 24 रोजी मडगाव रवींद्र भवनात झाली.

त्यातून अबकारीच्या तिजोरीत 29 हजार 200 रूपये महसूल जमा झाला, अशी माहिती काणकोणचे अबकारी अधीक्षक चंद्रनाथ देसाई यांनी दिली.

जास्त बोली लावणाऱ्या बोलीदाराला ही पावणी जाते. गेल्या वर्षी या 89 विभागातून अबकारी खात्याला 2 लाख 51 हजार 800 रूपयांचा महसूल मिळाला होता.

प्राप्त माहितीनुसार काजू फेणीला चांगली बाजारपेठ व भाव असूनही पन्नास टक्क्यांपेक्षा जास्त काजू बोंडे बिया काढून काजू रस न गाळता फेकून देतात. पूर्वीच्या काळी काजू बोंडाचा रस मानवी बळाचा वापर‌ करून काढण्यात येत होता.

आता मळणी यंत्र उपलब्ध आहे. आजही काजू रसापासून फेणी व हुर्राक तयार करण्यासाठी पारंपरिक उर्ध्वपातन पद्धतीचा वापर केला जातो.

काजूची रोपटी अनुदान तत्त्वावर

काणकोणात 3500 हेक्टर जमीन काजू लागवडीखाली आहे. गावडोंगरी, खोतीगाव, खोला व श्रीस्थळ या पंचायत क्षेत्रातील रहिवाशांचे हे नगदी पीक आहे.

त्यासाठी दरवर्षी कृषी खात्याकडून काजूची रोपटी अनुदान तत्त्वावर वितरित करण्यात येतात, असे विभागीय कृषी अधिकारी किर्तीराज नाईक यांनी सांगितले.